ԵՐԵՎԱՆ, 19 ՆՈՅԵՄԲԵՐԻ, ԱՐՄԵՆՊՐԵՍ: «Իմ քայլը» դաշինքն ունի ժողովրդի վստահության քվեն վաստակելու խնդիր, և ընտրություններից հետո կորոշի, թե ով որտեղ ավելի լավ կծառայի պետությանն ու քաղաքացիներին: «Արմենպրես»-ի հաղորդմամբ, կառավարության արտահերթ նիստից հետո լրագրողների հետ ճեպազրույցում այս մասին նշեց ՀՀ պետական վերահսկողության ծառայության պետ, «Քաղաքացիական պայմանագիր» կուսակցության անդամ, ԱԺ արտահերթ ընտրություններում «Իմ քայլը» դաշինքի ցուցակի 15-րդ համար Դավիթ Սանասարյանը: Նրա խոսքով՝ ինքը առաջադրվել է թիվ չորս ընտրատարածքում և հասկանալի պատճառներով մի քանի օրից արձակուրդ կվերցնի: «Քարոզարշավի անցկացման մասին ավելի միջնամասն կասեմ, բայց քարոզարշավի ընթացքում քայլելու եմ, ու հանդիպելու եմ ավելի շատ քաղաքացիների»,-ասաց նա:

Դավիթ Սանասարյանը ընդգծեց, որ նոր իշխանությունները ցույց են տալիս, որ կոռուպցիայի դեմ կռիվ են տալիս, և իրենց քայլերը օրինականության հաստատմանն են ուղղված: «Քաղաքացին իր գնահատականը կտա: Ճիշտ է՝ դժգոհողներ էլ կան, և մենք դժգոհություններն անպայման աչքի տակ ենք անցկացնում»,- շեշտեց Սանասարյանը: