1000х90.jpg (78 KB)

Երևանում՝ 11:07,   28 Մարտ 2024

Այստեղ սկսվում են քրիստոնյա աշխարհն ու Խորհրդային միության ավարտը. հունգարացի լրագրողները այցելել են Արցախ

 Այստեղ սկսվում են քրիստոնյա աշխարհն ու Խորհրդային միության ավարտը. 
հունգարացի լրագրողները այցելել են Արցախ

ԵՐԵՎԱՆ, 19 ՆՈՅԵՄԲԵՐԻ, ԱՐՄԵՆՊՐԵՍ: «Արմենպրես»-ը ներկայացնում է Արցախ այցելած հունգարացի բլոգերներ Ժոլտ Կերների (Kerner Zsolt) և Դավիդ Դերշենիի (Dávid Dercsényi) կողմից հունգարական առաջատար էլեկտրոնային կայքերում այցի վերաբերյալ հրապարակված հոդվածների համառոտ նկարագիրը:

Արցախ այցելած Հունգարացի լրագրող Ժոլտ Կերները հոդվածների շարք է հրապարակել Հունգարիայում մեծ լսարան ունեցող «24.hu» կայքում:

«Այստեղ սկսվում են Քրիստոնյա աշխարհն ու Խորհրդային միության ավարտը» վերնագրով հոդվածում Կերները համառոտ անդրադառնում է Արցախի դարավոր անցյալին: Արցախը, հեղինակի խոսքով, «եվրոպական քրիստոնեական քաղաքակրթության դարպասն է, իսկ Հայաստանը առաջին քրիստոնյա երկիրը, մարդկության բնօրրանը և նաև ջրհեղեղից հետո նոր կյանքի սկզբնավայրը»:

Հեղինակը ներկայացնում է Արցախյան հակամարտության արդի փուլի պատմությունը, նշելով, որ Արցախն ու Նախիջևանը Ադրբեջանին են հանձնվել Ստալինի կողմից: Հանգամանորեն ներկայացվում է 1988թ. սկսված Արցախյան շարժումը, որը որակվում է որպես Խորհրդային միության փլուզման սկիզբ:

Արցախյան այցին նվիրված իր շարքի երկրորդ հոդվածում հունգարացի լրագրող Կերները գեղարվեստական շարադրանքով անդրադառնում է ՀՀ-ից Արցախ տանող ճանապարհին, նկարագրելով հայկական բնությունը: Կերները ցորենի տեղ-տեղ այրված դաշտերը նմանեցնում է շախմատի խաղաղտախտակի՝ նշելով շախմատում հայերի ունեցած մեծ ժառանգության մասին: Նա անդրադառնում է նաև Հայոց ցեղասպանությանը, դրա հետևանքով աշխարհով մեկ սփռված հզոր հայկական սփյուռքին, որը նաև փորձում է նպաստել Արցախի միջազգային ճանաչմանը:

Կերները ներկայացնում է Ստեփանակերտի թողած տպավորությունները, ճարտարապետությունը, նրա բնակիչների յուրահատուկ մշակույթը: Ներկայացնում է նաև պետական նախարար Գրիգորի Մարտիրոսյանի հետ ունեցած հանդիպումը, որի ժամանակ պետնախարարը խոսել է Արցախի տնտեսության, զարգացման հեռանկարների մասին: Կերների խոսքով՝ թեև Արցախը Հայաստանի հետ կապված է անհաշվելի թելերով, սակայն կան նաև տարբերություններ: Օրինակ՝ կառավարման ձևը նախագահական է, և երկիրը չնայած որոշ բացթողումների՝ նախագահական ժողովրդավարություն է:

Իր շարքի վերջին հոդվածում Կերներն անդրադառնում է հայ-հունգարական հարաբերություններին: Հեղինակը ընդգծում է հայ համայնքի մեծ ժառանգությունը Հունգարիայի պատմության մեջ՝ հատկապես տնտեսական բնագավառում: Կերները հանգամանորեն անդրադառնում է հայ սպային կացնահարած Սաֆարովի արտահանձնման հետևանքով երկու երկրների հարաբերություններում առաջացած ճգնաժամին: Լրագրողը նշում է, որ Հունգարիայում ևս բոլորի համար ապշեցուցիչ էր Սաֆարովի ազատ արձակումն ու հերոսացումը Ադրբեջանում:

 Արցախ այցելած հունգարացի մեկ այլ լրագրող Դավիդ Դերշենին, ով  հունգարական ամենախոշոր կայքերից մեկը՝ «Hvg.hu»-ն է ներկայացնում, իր՝ “Լեռնային Ղարաբաղ. մենք գտանք հիանալի գանձեր չճանաչված երկրում” հոդվածում նկարագրել է սեպտեմբերին Արցախ կատարած այցից ստացած տպավորությունները, Ղարաբաղի «ֆանտաստիկ բնության գեղեցկությունը, պատմական հուշարձանները, որոնք գրավում են աշխարհի ավելի ու ավելի շատ թվով մարդկանց»:

Լրագրողը համառոտ անդրադառնում է Լեռնային Ղարաբաղի հակամարտության պատմությանը՝ ընդգծելով, որ 1920-ականների սկզբին “Արցախն ու հայկական պատմական այլ հողեր Ստալինի կողմից են բռնակցվել Ադրբեջանին”:

Հունգարացի լրագրողը անդրադարձել է Արցախի պետնախարար Գրիգորի Մարտիրոսյանի, արտգործնախարար Մասիս Մաիլյանի հետ ունեցած հանդիպումներին, որոնց ժամանակ պաշտոնյաները ներկայացրել են Արցախի տնտեսության զարգացման հեռանկարները, արտաքին քաղաքականության ուղղությունները:

Հոդվածագիրը հատուկ ուշադրություն է դարձրել Թումո տեխնոլոգիական կենտրոնին՝ նկարագրելով պատանիներին անվճար մատուցվող բարձրակարգ տեխնոլոգիական կրթությունն ու նորարարական կենտրոնի աշխատանքները:

Հոդվածում հատուկ անդրադարձ է կատարվել Արցախի պատմամշակութային ժառանգությանը: Հեղինակը նշում է, որ հայերն աշխարհում քրիստոնեությունն ընդունած ամենահին ազգն են, հիացմունքով նկարագրում այցերը հինավուրց վանքեր (Ամարաս, Դադիվանք, Գանձասար, Շուշիի Սբ. Ամենափրկիչ), Արցախի տեսարժան այլ վայրեր (Ջդրդուզ, Տնջրի):

Արցախի համեղ սննդով հիացած հունգարացի լրագրողը միաժամանակ նշում է, որ երկրի տուրիստական ներուժի փոքր մասն է օգտագործվում:

Դերշենին ընդգծում է արցախահայության քրիստոնեական հավատքի պատմական դերը, նշում Արցախի թեմի առաջնորդ Պարգև Սրբազանի հետ ունեցած հանդիպման մասին, անդրադառնում հայկական ազգային ավանդույթներին, արժեքներին, ընտանիքի նկատմամբ առանձնահատուկ վերաբերմունքին:


Բաժանորդագրվեք մեր ալիքին Telegram-ում






youtube

AIM banner Website Ad Banner.jpg (235 KB)

Բոլոր նորությունները    


Digital-Card---250x295.jpg (26 KB)

12.png (9 KB)

Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]