ՀՅԴ-ն 152 հոգանոց ցուցակ ներկայացրեց ԿԸՀ. կուսակցությունն ընտրություններից հետո չի գործելու իշխանության դաշտում
ԵՐԵՎԱՆ, 14 ՆՈՅԵՄԲԵՐԻ, ԱՐՄԵՆՊՐԵՍ: Հայ Յեղափոխական Դաշնակցություն կուսակցությունը դեկտեմբերի 9-ին կայանալիք ԱԺ արտահերթ ընտրությունների մասնակցության նախընտրական ցուցակը ներկայացրեց Կենտրոնական ընտրական հանձնաժողով: Այն գլխավորում է ՀՅԴ բյուրոյի քաղաքական ներկայացուցիչ Արմեն Ռուստամյանը: «Արմենպրես»-ի փոխանցմամբ` այս մասին նոյեմբերի 14-ին ԿԸՀ-ում լրագրողների հետ զրույցում նշեց ՀՅԴ Գերագույն մարմնի անդամ Վահագն Մատինյանը:
«ԿԸՀ-ի հաստատմանն ենք ներկայացրել 152 հոգանոց ցանկ: Առաջին համարը ՀՅԴ բյուրոյի քաղաքական ներկայացուցիչ Արմեն Ռուստամյանն է, երկրորդը` ՀՅԴ ԳՄ ներկայացուցիչ Արսեն Համբարձումյանը, 3-րդ տեղում Գյուղատնտեսության նախկին նախարար Արթուր Խաչատրյանն է»,- ասաց Մատինյանը:
Նրա խոսքով` իրենք ընտրություններից հետո չեն գործելու իշխանության դաշտում, իսկ կոալիցիոն հուշագիր չեն կնքելու:
«Ընդդիմությունն ու իշխանությունը միշտ ձևավորվում են ընտրություններից հետո, բայց այս պահին, քանի որ իշխանություն չենք, տրամաբանական է, որ այդ դաշտում չենք գործելու: Որ պարագաներում որ կնքվել է հուշագիր, ամեն դեպքում եղել է իր բացատրությունը: Այս անգամ չեմ ուզում շտապել, բայց կարծում եմ, որ նման բան չի լինի, քանի որ արդեն հայտարարել ենք, որ այլևս, եթե չկա Դաշնակցության կարիքը` Աժ-ում մեծամասնություն կազմելու, այդ պարագայում կոալիցիոն հուշագիր կնքելը դառնում է անիմաստ»,- ընդգծեց Վահագն Մատինյանը:
ՀՅԴ ցուցակի առաջին տասը համարներն են.
- Ռուստամյան Արմեն Եզնակի, ՀՀ ԱԺ ՀՅԴ խմբակցության ղեկավար
- Համբարձումյան Արսեն Խաչիկի, ՀՅԴ Հայաստանի ԳՄ ներկայացուցիչ
- Խաչատրյան Արթուր Լևոնի, չի աշխատում
- Կյուրեղյան Արմենուհի Ստեփանի, ՀՀ ԱԺ ՀՅԴ խմբակցության պատգամավոր
- Սեյրանյան Սպարտակ Արմենակի, ՀՀ ԱԺ ՀՅԴ խմբակցության պատգամավոր
- Մինասյան Արծվիկ Գարեգինի, չի աշխատում
- Պետրոսյան Նունե Աշոտի, ՀՀ ԱՍՀՆ ՀՀ ԲՍՓԳ մանկ. մասն. հանձնաժողովի նախագահ
- Սաղաթելյան Իշխան Վաչիկի, «Իմեգա սերվիզ» ՍՊԸ-ի հիմնադիր
- Սիմոնյան Աշոտ Ժորայի, չի աշխատում
- Մանուկյան Սուրեն Սերժիկի, ՀՀ ԱԺ ՀՅԴ խմբակցության պատգամավոր:
Ցուցակն ամբողջությամբ ՝այստեղ:
Հայաստանում արտահերթ խորհրդարանական ընտրությունները կայանալու են 2018թ-ի դեկտեմբերի 9-ին, նախընտրական քարոզարշավը կմեկնարկի նոյեմբերի 26-ից։ Կուսակցությունների ու կուսակցությունների դաշինքների գրանցումը ԿԸՀ-ն կիրականացնի մինչև նոյեմբերի 19-ը, ժամը 18։00-ն։ Քարոզչության ժամանակահատվածը նոյեմբերի 26-ից դեկտեմբերի 7-ն է։ Ընտրական օրենսգրքով սահմանվել է 12-օրյա ժամկետ:
Բաժանորդագրվեք մեր ալիքին Telegram-ում