ՀՀԿ-ն ԱԺ արտահերթ ընտրություններին մարտական է տրամադրված. կուսակցությունը 125 հոգանոց ցուցակ է ներկայացրել ԿԸՀ
ԵՐԵՎԱՆ, 14 ՆՈՅԵՄԲԵՐԻ, ԱՐՄԵՆՊՐԵՍ: Հայաստանի Հանրապետական կուսակցությունը դեկտեմբերի 9-ին կայանալիք ԱԺ արտահերթ ընտրություններին մասնակցության իր նախընտրական ցուցակը ներկայացրեց Կենտրոնական ընտրական հանձնաժողով: Կուսակցությունը ընտրություններին մարտական է տրամադրված: «Արմենպրես»-ի փոխանցմամբ` այս մասին նոյեմբերի 14-ին Կենտրոնական ընտրական հանձնաժողովում նշեց ԱԺ պատգամավոր, ՀՀԿ անդամ Կարինե Աճեմյանը:
«Մարտական ենք տրամադրված, տրամադրված ենք, որպեսզի հաղթենք, ունենանք տեղեր, որ կարողանանք պայքարել այն ամենի համար, ինչի մասին խոսում էինք: Հուսով եմ, որ կունենանք նորմալ քարոզարշավ, խաղի կանոնները չենք խախտի և, առհասարակ, ավելի շատ հանդես կգանք գաղափարաքարոզչական շրջանակում: Մենք ակնկալում ենք մեծ թվով քվեներ ու անպայման ակնկալում ենք, որ հանդես կգանք խորհրդարանում, բայց այս պահին չեմ կարող ասել, թե որ դիրքերից»,- ընդգծեց Աճեմյանը:
Կարինե Աճեմյանի խոսքով` իրենց ցուցակում լինելու են թե՛ փարձառու, թե՛ նոր դեմքեր:
«Կան նոր մարդիկ, և մարդիկ, ովքեր երկար ճանապարհ են անցել: Առհասարակ, քաղաքական գործչի փորձը շատ կարևոր է: Ե՛վ կառավարությունում, և՛ խորհրդարանում փորձառու մարդիկ պետք է լինեն, և նոր մարդիկ էլ, որոնք թարմություն կբերեն»,- ասաց նա:
ՀՀԿ անդամը նշեց, որ իրենց կուսակցության նախագահ Սերժ Սարգսյանը մասնակցություն չի ունենա ընտրական գործընթացներին:
Կուսակցությունը հրապարակել է իր նախընտրական ցուցակը
- Սարգսյան Վիգեն Ալեքսանդրի, ՀՀԿ
- Հովհաննիսյան Արփինե Աշոտի, ՀՀԿ
- Շահնազարյան Դավիթ Գուրգենի, անկուսակցական
- Բաղդասարյան Վահրամ Վաղինակի, ՀՀԿ
- Աշոտյան Արմեն Գևորգի, ՀՀԿ
- Շարմազանով Էդուարդ Հովսեփի, ՀՀԿ
- Սահակյան Արման Գալուստի, ՀՀԿ
- Աճեմյան Կարինե Խաչիկի, ՀՀԿ
- Հարությունյան Մենուա Արտակի, անկուսակցական
- Գեղամյան Արտաշես Մամիկոնի. ԱՄԿ:
Ամբողջական ցուցակը` այստեղ:
Հայաստանում արտահերթ խորհրդարանական ընտրությունները կայանալու են 2018թ-ի դեկտեմբերի 9-ին, նախընտրական քարոզարշավը կմեկնարկի նոյեմբերի 26-ից։ Կուսակցությունների ու կուսակցությունների դաշինքների գրանցումը ԿԸՀ-ն կիրականացնի մինչև նոյեմբերի 19-ը, ժամը 18։00-ն։ Քարոզչության ժամանակահատվածը նոյեմբերի 26-ից դեկտեմբերի 7-ն է։ Ընտրական օրենսգրքով սահմանվել է 12-օրյա ժամկետ:
Բաժանորդագրվեք մեր ալիքին Telegram-ում