Արևելագետները մեծ ներդրում ունեն Հայաստանի տարբեր պատասխանատու ոլորտներում. ԵՊՀ արևելագիտության ֆակուլտետը նշում է հիմնադրման 50-ամյակը
ԵՐԵՎԱՆ, 9 ՆՈՅԵՄԲԵՐԻ, ԱՐՄԵՆՊՐԵՍ: ԵՊՀ արևելագիտության ֆակուլտետը նշում է հիմնադրման 50-ամյակը: Ֆակուլտետի շրջանավարտներն այս տարիներին իրենց մեծ ներդրումն ունեն գրեթե բոլոր գերատեսչությունների աշխատանքներում, տարբեր պատասխանատու ոլորտներում:
«Արմենպրես»-ի հաղորդմամբ՝ նոյեմբերի 9-ին ֆակուլտետի հիմնադրման 50-ամյակին նվիրված հանդիսավոր նիստին ներկա էր ՀՀ նախագահ Արմեն Սարգսյանը:
«Այս ֆակուլտետի հիմքի վրա մի շարք հզոր կառույցներ կստեղծվեն, որոնք կկրեն այն կարևոր և նշանակալից ազգային պահանջը, որ մենք ունենք: Հայաստանը Մետաքսի ճանապարհի կենտրոնը, տարբեր քաղաքակրթությունների խաչմերուկը, քաղաքական հսկայական իրադարձությունների կենտրոնն է: Եվ այդ կենտրոնը լինելով՝ Հայաստանը պետք է իր դերը ստանձնի: Եվ այդ դերի մեջ հսկայական նշանակություն ունի արևելագիտությունը: Այսօր Հայաստանի համար առաջ գնալու ճանապարհը բաց համակարգն է, աշխարհի հետ շփվելը, համագործակցելը: Այս դեպքում արևելագիտությունն ավելի խորը հասկացություն է դառնում»,-ասաց նախագահ Արմեն Սարգսյանը:
Նախագահն առաջարկեց ֆակուլտետում արաբագիտության, թուրքագիտության և իրանագիտության ֆակուլտետների շարքն ընդլայնել նաև հնդկագիտության և այլ ֆակուլտետներով: «Ինձ համար արևելագիտությունն ավելի լայն պետք է լինի: Չեմ կարծում, որ այսօրվա արևելագիտությունը սահմանափակվում է միայն գիտական-ակադեմիական հետազոտությամբ, այսօր արևելագետները Հայաստանի փայլուն դիվանագետներից են: Արևելագիտությունն այսօր նաև պետական ծառայություն է, շատ արևելագետներ ԱԺ-ում են, պետական ծառայության մեջ: Արևելագիտությունը նաև տնտեսական հարաբերություն է: Արևելագիտությունը շատ խորն է»,-նկատեց նա:
ՀՀ կրթության և գիտության նախարարի պաշտոնակատար Արայիկ Հարությունյանի կարծիքով՝ ֆակուլտետն ունի ակադեմիական լուրջ ավանդույթներ: Ֆակուլտետը նաև կարևոր քաղաքական դարբնոց է եղել: Ուսանողներն ու դասախոսները միշտ շատ ակտիվ են եղել: «Տարբեր ոլորտներում, յուրաքանչյուր գերատեսչությունում, հատկապես արտաքին գործերի նախարարությունում արևելագետները մեծ ներդրում ունեն: Շրջանավարտների սերունդները մեծ հաջողությունների են հասել»,-նշեց նախարարի պաշտոնակատարը:
Ֆակուլտետի անցած ուղին դիտարկելիս նա նշեց մի քանի առանձնահատկություն՝ ակադեմիական ազատ մշակույթի նվազագույն վարչարարությունն ու իրական ուսանողակենտրոնության մթնոլորտը:
Արևելագիտության ֆակուլտետի դեկան Ռուբեն Մելքոնյանը նշեց, որ այս օրը խորհրդանշական է ֆակուլտետի համար: Նա հոբելյանական այս տարեթիվը լավագույն առիթներից համարեց՝ ամփոփելու հայկական արևելագիտության ձևավորման, կայացման և զարգացման հարցը: Նա հիշեց ֆակուլտետի երախտավորներին, ֆակուլտետի պատմությունն ու ներկայացրեց նորօրյա գործունեության արդյունքները:
«Մենք ֆակուլտետում ստեղծել ենք նաև նոր ուղղություններ՝ օսմանագիտություն, ադրբեջանագիտություն և թալիշագիտություն»,-նշեց դեկանը:
Հոբելյանական նիստին ՀՀ պաշտպանության փոխնախարար Գաբրիել Բալայանը փոխանցեց նախարարի պաշտոնակատար Դավիթ Տոնոյանի խոսքը: «Տարբեր տարիներ արևելագետները համալրել են ՀՀ պաշտպանության նախարարության շարքերը: Տարբեր պատասխանատու ոլորտներում մեծ ներդրում են ունեցել և ներկայում էլ շարունակում են ունենալ: Պաշտպանության նախարարության և ԵՊՀ արևելագիտության ֆակուլտետի միջև ձևավորվել է սերտ համագործակցություն: Այդ համագործակցությունը կրում է ինստիտուցիոնալ բնույթ»,-նշեց նա:
Նիստի ավարտից հետո մեկնարկեց Հայկական արևելագիտական առաջին միջազգային կոնգրեսը (ACOS’18), որը տևելու է 2 օր՝ նոյեմբերի 9-10-ը: Կոնգրեսը նվիրված է ֆակուլտետի 50-ամյակին և Առաջին համաշխարհային պատերազմի ավարտի 100-ամյակին: Կոնգրեսին մասնակցում են շուրջ երեք տասնյակ գիտնականներ արտասահմանից (ԱՄՆ, ՌԴ, Եվրոպա, Մերձավոր Արևելք):
Բաժանորդագրվեք մեր ալիքին Telegram-ում