ԵՐԵՎԱՆ, 8 ՆՈՅԵՄԲԵՐԻ, ԱՐՄԵՆՊՐԵՍ: Հայաստան գազամատակարարման համար այս տարվա ընթացքում ավարտվում են գործող բոլոր պայմանագրերի ժամկետները: Եվ ներկայում ընթանում են բանակցություններ գնման գնի ձևավորման շուրջ:

«Արմենպրես»-ի հաղորդմամբ` նոյեմբերի 8-ին ԱԺ գազի և էլեկտրաէներգիայի հարցով քննիչ հանձնաժողովում այս մասին ասաց «Գազպրոմ Արմենիա» ՓԲԸ վարչության նախագահ -գլխավոր տնօրեն Հրանտ Թադևոսյանը:

«Սահմանին գազի գնման գինը 150 դոլար է, որը միջկառավարական համաձայնագրերով է սահմանվում: Գազի վաճառքի միջին սակագինը Հայաստանում 255 դոլար է:

Այս տարվա ընթացքում ավարտվում են գործող բոլոր պայմանագրերի ժամկետները: Եվ ներկայում ընթանում են բանակցություններ գնման գնի ձևավորման շուրջ: Երբ կավարտվեն և «Գազպրոմ Արմենիա»-ն  կստանա թվերը, կներկայացնենք վաճառքի գնի մեր առաջարկությունները»,-ասաց Թադևոսյանը:

 Նա շեշտեց, որ բնակչությանը մատակարարվող գազն անցնում է երկար ճանապարհ, և դրա հետ կապված ծախսերն ավելի շատ են:  Վաճառվող գազի գնի հիմքում դրված են բարդ տնտեսական հաշվարկնեը: «Եթե սպառողներին հասնելու համար գազը թանկ է լինում, ապա նրանք պետք է թանկ վճարեն: Դա այդպես է ողջ աշխարհում»,-նշեց գլխավոր տնօրենը: