Ժամանակը Երևանում՝ 11:07:36,   19 Նոյեմբեր

Փաշինյանի և Ալիևի՝ Դուշանբեում պայմանավորվածությունից հետո սահմանին լարվածությունը բավականին նվազել է. Դավիթ Տոնոյան


ԵՐԵՎԱՆ, 6 ՆՈՅԵՄԲԵՐԻ, ԱՐՄԵՆՊՐԵՍ: ՀՀ վարչապետի պաշտոնակատար Նիկոլ Փաշինյանի և Ադրբեջանի նախագահ Իլհամ Ալիևի՝ Դուշանբեում պայմանավորվածությունից հետո սահմանին լարվածությունը բավականին նվազել է: Երկու կողմերի միջև կա օպերատիվ կապ:

«Արմենպրես»-ի հաղորդմամբ` նոյեմբերի 6-ին ԱԺ-ում 2019 թ. պետական բյուջեի նախագծի  քննարկումից առաջ այս մասին լրագրողների հետ զրույցում հայտնեց ՀՀ պաշտպանության նախարարի պաշտոնակատար Դավիթ Տոնոյանը:

«Սահմանին լարվածությունը բավականին նվազել է Դուշանբեի պայմանավորվածություններից հետո: Երկու կողմերի միջև կա օպերատիվ կապ՝ հեռախոսակապ: Մեզ կամ ադրբեջանական կողմին մտահոգող դեպքերի, շարժի, գործողությունների իրականացման դեպքում ահազանգում ենք անմիջապես, որպեսզի դադարեցնեն»,-ասաց Տոնոյանն ու նշեց, որ մինչ այս պահն այդ կապը եղել է կառուցողական:

Նա նշեց, որ Հայաստանի և Ադրբեջանի ղեկավարների միջև անմիջական կապ չկա:  Նախարարի պաշտոնակատարը վստահեցրեց, որ եթե ադրբեջանական կողմից աշխատանքներ են կատարվում, որոնք ուղղված են լինում դիրքերի բարելավմանը, հայկական կողմն անմիջապես արձագանքում է:

Հայաստանի Հանրապետության վարչապետ Նիկոլ Փաշինյանը ԱՊՀ գագաթնաժողովի շրջանակում Դուշանբեում Ադրբեջանի նախագահ Իլհամ Ալիևի հետ պայմանավորվածություն էր ձեռք բերել սահմանագծում լարումը նվազեցնելու և միջադեպերը կանխելու վերաբերյալ: Խոսակցության ընթացքում արձանագրվել էր նաև  բանակցային գործընթացի նկատմամբ հավատարմությունը:




Այս թեմայով

... վերջին լուր "Ղարաբաղյան հիմնահարց" թեմայով
Լրահոս

Բոլոր նորությունները    




Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
Яндекс.Метрика
Էջի կարգավորումներ