Մխիթար Հայրապետյանը Նորվեգիայի պատվավոր հյուպատոսին հանձնեց Ֆրիտյոֆ Նանսենի դիմանկարը
ԵՐԵՎԱՆ, 6 ՆՈՅԵՄԲԵՐԻ, ԱՐՄԵՆՊՐԵՍ: Սփյուռքի նախարարի պաշտոնակատար Մխիթար Հայրապետյանը հոկտեմբերի 6-ին Հայաստանում Նորվեգիայի Թագավորության պատվավոր հյուպատոս Թիմոթի Դեյվիդ Սթրայթին հանձնեց ՀՀ կառավարության նվերը ` սփյուռքահայ Դանիել Վարուժան Հեճինեանի հեղինակած Ֆրիտյոֆ Նանսենի դիմանկարը:
Ինպես տեղեկացնում է «Արմենպրես»-ը, «Նանսեն, կամուրջը բարեկամության և խաղաղության» նկարն արտահայտում է հայ և նորվեգ ժողովուրդների բարեկամությունը, որով Հայաստանը և հայ ժողովուրդն իրենց երախտագիտությունն են հայտնում մեծ հումանիստ Ֆրիտյոֆ Նանսենին` հայ ազգին ցուցաբերած անձնվեր վերաբերմունքի, սրտացավության և անգնահատելի աջակցության համար, ինչպես նաև Նորվեգիային և նորվեգ ժողովրդին` 1988 թ. երկրաշարժի ժամանակ Հայաստանին մարդասիրական օգնություն ցուցաբերելու համար:
Լրագրողների հետ զրույցում ՀՀ սփյուռքի նախարարի պաշտոնակատար Մխիթար Հայրապետյանը նշեց, որ այս միջոցառումը շատ լավ առիթ է, որպեսզի ևս մեկ անգամ ընդգծվի հայ-նորվեգական բարեկամության և այդ բարեկամության ակունքների մասին:
«Դրանում մեծագույն ավանդ են ունեցել հայ ժողովրդի մեծ բարեկամ Ֆրիտյոֆ Նանսենը և միսիոներ Կատարինա Բյորնը: Գաղտնիք չէ, որ հատկապես հայոց ցեղասպանության տարիներին և դրանից հետո այս երկու անձինք մեծագույն դերակատարում ունեցան, մասնավորապես` նանսենյան անձնագրերի միջոցով շուրջ 350 հազար հայ փախստականներ կարողացան ապաստան գտնել ինչպես Հայաստանում, այնպես էլ աշխարհի շատ երկրներում, իսկ Կատարինա Բյորնը հազարավոր ծնողակորույս երեխաների համար կարողացավ ապաստան գտնել: Այպիսով` ավելի քան 100 տարի շարունակ հայ-նորվեգական հարաբերությունները գտնվում են ամենաբարձր մակարդակում»,-ասաց Հայրապետյանը:
Նրա խոսքով` մինչ օրս Նորվեգիայի կառավարությունը պատվո հյուպատոսի միջոցով տարատեսակ ծրագրեր է իրականացնում մարզերում, մասնավորապես` Սյունիքի, Տավուշի և Շիրակի մարզերում:
Նկարն արված է կտավի վրա` յուղաներկով և ակրիլով: Կենտրոնում Նանսենի դիմանկարն է, թիկունքին` Նորվեգիայի դրոշն ու քարտեզը, դիմացը` Արարատ լեռն է ու Հայաստանը եռագույնով, որի խաղաղության խորհրդանիշ կապույտն անցնում է նրա մատների միջով և միանում է Նորվեգիայի դրոշի կապտագույն խաչին` վերածվելով երկրների միջև բարեկամության կամուրջի և արտահայտելով երկու ժողովուրդների և պետությունների կողմից խաղաղության ձգտումը: Նանսենի աջ ձեռքում աղավնի է, որն իր հերթին խորհրդանշում է Նանսենի պայքարը հանուն խաղաղության, որի համար նա արժանացել է Խաղաղության Նոբելյան մրցանակի:
Նկարում պատկերված Արարատ լեռան ստորոտի և Նանսենի գլխի հետևի մասում արտացոլված է ինքնաթիռի պատկեր, որը խորհրդանշում է Նորվեգիայի Թագավորության կառավարության և նորվեգացի ժողովրդի աջակցությունն ու մարդասիրական օգնությունը Հայաստանին` 1988 թվականի երկրաշարժի ծանր օրերին:
Բաժանորդագրվեք մեր ալիքին Telegram-ում