Ժամանակը Երևանում՝ 11:07:36,   1 Հուլիս 2022

Գրականագետ Դավիթ Գասպարյանը Սոնա Վանի պոեզիան վերլուծող «Հրե վարդ»  գիրքը դրեց ընթերցողի սեղանին

Գրականագետ Դավիթ Գասպարյանը Սոնա Վանի պոեզիան վերլուծող «Հրե վարդ»  
գիրքը դրեց ընթերցողի սեղանին

ԵՐԵՎԱՆ, 30 ՀՈԿՏԵՄԲԵՐԻ, ԱՐՄԵՆՊՐԵՍ: Գրականագետ, գրաքննադատ, բանասիրական գիտությունների դոկտոր, պրոֆեսոր Դավիթ Գասպարյանի «Հրե վարդ» գրքում հեղինակը վերլուծել է հայտնի ժամանակակից բանաստեղծ Սոնա Վանի ստեղծագործությունները, մատնանշել նրա դերը հայ գրականության զարգացման գործում: Գիրքը լույս է տեսել «21-րդ դար: Հայ գրողներ»  մատենաշարով, որը գրականագետի նախորդ` «20-րդ դար: Հայ գրողներ»   մատենաշարի շարունակությունն է:

«Արմենպրես»-ի հաղորդմամբ`գրքի շնորհանդեսը տեղի ունեցավ հոկտեմբերի 30-ին Հայաստանի ազգային գրադարանում:

«Ըստ իս` Սոնա Վանի ստեղծագործության գլխավոր առանձնահատկությունն այն է, որ գրողը շատ արդիական հայացք ունի, ինտելեկտուալ  է, շատ խորքից է նայում, դիտարկում  երևույթները: Այսօր բանաստեղծները շատ են, բայց քչերին է հաջողվում թափանցել մարդու հոգու խորքը: «Բայց դառնում է պոետ նա մեծ ոչ թե խոսքի մեծությամբ, այլ նշանի ահագնությամբ, որ սերունդներ է գերում».  Չարենցի խոսքերն են»,- մեջբերեց Գասպարյանը:

Նա ընդգծեց, որ Սոնա Վանին տեսնում է շատ կարևոր մի հանգույցում` Վահան Տերյան, Եղիշե Չարենց, Պարույր Սևակ:

Խոսելով վերնագրի մասին` հեղինակն ասաց, որ «Հրե վարդը» ճանապարհին աճած վարդն է, հենց մոտենում ես, ձեռքերդ այրում է, բայց պետք է ուժ ունենաս, որ գրկես այն ու շունչ քաշես:

Սոնա Վանը խոստովանեց`համեստաբար և մեծամտաբար ուրախ է, որ  Դավիթ Գասպարյանն անդրադարձել է իր պոեզիայի ֆենոմենին: «Դա մեծ բան է, և ես շնորհակալ եմ նրան: Գուցե շնորհակալությունը ճիշտ բառ չէ: Եթե պոեզիան արժանացել է  գրականագետի ուշադրությանը, ուրեմն այն երկխոսության ցանկություն է առաջացրել, որովհետև ամեն գրականություն երկխոսություն է, այսինքն՝ գրականագետը ցանկացել է լինել իմ աշխարհում, զրուցել իմ հերոսների հետ, տեսնել ինձ, որովհետև պոեզիան նաև բանաստեղծի հոգեբանական մերկացման  գործընթաց է»,- նշեց Սոնա Վանը:

Նրա խոսքով` Գասպարյանի գրի միջոցով  բացահայտել է իրեն: «Ինձ միշտ թվացել է, թե իմ ինտուիցիան է արագ, ոչ թե իմ միտքը: Դավիթ Գասպարյանի հայացքով՝ իմ միտքը  և ինտուիցիան հավասարապես արագ են: Գիրքը կարդացել եմ հասկանալու, թե այն գրականագետը, որը ծանոթ է մեր լավագույն պոեզիայի թռիչքներին, ինչպես է գնահատում իմ թռիչքն այդ երամի մեջ, և ես տեսնում եմ, որ բարձր է գնահատել»,-ասաց բանաստեղծը:

Դավիթ Գասպարյանը ծնվել է 1947 թվականի հոկտեմբերի 18-ին Երևանում: Ավարտել է ԵՊՀ բանասիրական ֆակուլտետը։ Աշխատել է Հայաստանի ԳԱԱ Մանուկ Աբեղյանի անվան գրականության ինստիտուտում, եղել է նույն ինստիտուտի փոխտնօրեն՝ գիտության գծով, ԵՊՀ հրատարակչության տնօրեն, Խ. Աբովյանի անվան պետական մանկավարժական համալսարանի ռուս և արտասահմանյան գրականության ամբիոնի վարիչ։ Ներկայումս որպես գլխավոր մասնագետ աշխատում է ԿԳՆ Կրթության ազգային ինստիտուտում։ «Հայոց լեզու և գրականություն» գիտամեթոդական ամսագրի գլխավոր խմբագիրն է։

Սոնա Վանը 1975 թվականին ավարտել է Երևանի բժշկական ինստիտուտը: 1978 թվականից ապրում է Կալիֆոռնիայում։ Ամերիկյան համալսարանում ստացել է կլինիկական և հոգևոր-հոգեբանական մագիստրոսի կոչում։ Քնարախոհական բանաստեղծությունների հեղինակ է:

 Նրա ժողովածուներն են` «Լույսի ծվեններ»,  «Ես անուն չունեմ»,  «Ես ձայն եմ լսում», «Չառա անունով թռչունը» և այլն:  Նրա գրքերը թարգմանվել են անգլերեն, ֆրանսերեն, ռուսերեն,  հունարեն և այլ լեզուներով: Սոնա Վանն արժանացել է ՀՀ մշակույթի, ՀՀ սփյուռքի նախարարությունների ոսկե մեդալների:

 








youtube

Բոլոր նորությունները    


Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]