Իվետա Մուկուչյանը երկրպագուներին է ներկայացրել իր նոր տեսահոլովակը
ԵՐԵՎԱՆ, 25 ՀՈԿՏԵՄԲԵՐԻ, ԱՐՄԵՆՊՐԵՍ: Ուժեղ և նպատակասլաց կնոջ մասին է պատմում հայկական երգարվեստի ամենավառ ներկայացուցիչներից մեկի` Իվետա Մուկուչյանի «Rich Bitch» երգի հիման վրա նկարահանված տեսահոլովակը:
«Արմենպրես»-ի հաղորդմամբ, այդ ստեղծագործությունը երգչուհու եռագրության երկրորդ հատվածն է: Ինչպես եռագրության առաջին մասը` «Մարգո»-ն, այնպես էլ երկրորդ հատվածը նկարահանվել է Հարավային Աֆրիկայում։
Նոր երգը ռեպային որոշակի տարրեր է պարունակում։ Այն այս աշխարհում կնոջ դիրքի փնտրտուքի և երբեմն տղամարդկանց շրջանում առկա սխալ ընկալումների մասին է։ Տեսահոլովակում կնոջ կերպարն ուժեղ է, չի հանձնվում, շարունակում է պայքարել և հաստատել աշխարհում գոյության իր իրավունքը։
«Ritch Bitch»-ում առկա է թագուհու կերպարը։ Նա շարունակում է քայլել, անհաղորդ մնալ իրեն ուղղված առաջարկներին, իսկ թե որտեղ կամփոփվի նրա ճանապարհը, պարզ կդառնա եռագրության հաջորդ հատվածում, որը կներկայացվի առաջիկայում և կապահովի թեմայի հանգուցալուծումը։
Երգի խոսքերն ու երաժշտությունը հեղինակել է Իվետա Մուկուչյանը, գործիքավորումն իրականացրել է Դարքո Բիթսը, երաժշտական ձևավորման հեղինակը Դեիմոս Վիրգիլիտտոն է, տեսահոլովակի ռեժիսորը Նիք Էվին է:
Բաժանորդագրվեք մեր ալիքին Telegram-ում