Գենադի Սվիդերսկին առաջարկում է հրաժարվել ազգային արտադրողին ԵԱՏՄ առաջարկածից ավելի լավ պայմաններ տալու գայթակղությունից
ԵՐԵՎԱՆ, 22 ՀՈԿՏԵՄԲԵՐԻ, ԱՐՄԵՆՊՐԵՍ: Բելառուսի Հանրապետության արդյունաբերության նախարարի առաջին տեղակալ Գենադի Սվիդերսկին կարծում է, որ Եվրասիական տնտեսական միության անդամ երկրները պետք է հրաժարվեն ազգային արտադրողների համար Միության առաջարկած պայմաններից ավելի լավ պայմաններ ստեղծելու գայթակղությունից: Ինչպես հաղորդում է «Արմենպրես»-ը, Գենադի Սվիդերսկին նման կարծիք հայտնեց Երևանում մեկնարկած «Եվրասիական շաբաթ» միջազգային համաժողովի պլենար նիստի ընթացքում: «Միշտ կա ազգային արտադրողին տալ ավելի լավ պայմաններ, քան ԵԱՏՄ-ի պայմաններն են: Այս գայթակղությունից բոլորս պետք է փորձենք հրաժարվել, որովհետև, երբ մենք հավասար պայմաններ ենք տալիս և բոլորս իրականացնում ենք նույն չափանիշները, դա ընդլայնում է արտադրողականությունը, իսկ ամենակարևորը՝ բիզնեսին վստահություն է տալիս, որ ամեն ինչ կայուն է ու երկարաժամկետ»,- ասաց նա:
Բելառուսի արդյունաբերության նախարարի առաջին տեղակալն ընդգծեց, որ բիզնեսի համար ամենակարևորը հենց կայունությունն ու երկարաժամկետ հեռանկարն են: Նա հույս հայտնեց, որ «Եվրասիական շաբաթ» համաժողովը հնարավորություն կտա, որպեսզի որոշ խոչընդոտներ հաղթահարվեն, ինչը հնարավորություն կտա բարձրացնել վստահությունն ու աշխատանքի արդյունավետությունը:
Բաժանորդագրվեք մեր ալիքին Telegram-ում