ԵՐԵՎԱՆ, 18 ՀՈԿՏԵՄԲԵՐԻ, ԱՐՄԵՆՊՐԵՍ: Նիդերլանդների Զվոլե քաղաքի վերաքննիչ դատարանը հոկտեմբերի 17-ին քննել է  Հաագայի Թուրք-ադրբեջանական մշակութային միության նախագահ Իլհամ Աշկինի բողոքը 2017 թվականի մարտի 17-ին Ալմելոյի առաջին ատյանի դատարանի վճռի դեմ, որը կայացվել է հայերի դեմ բռնություն հրահրելու մեղադրանքով։ Այս մասին «Արմենպրես»-ին տեղեկացրեց «Հոլանդահայ կազմակերպությունների ֆեդերացիա»-ի նախագահ Մաթո Հախվերդյանը:

« Իլհամ Աշկինը բողոքարկել էր առաջին ատյանի դատարանի որոշումը: Հոկտեմբերի 17-ին վերաքննիչ դատարանը քննեց գործը, դատական նիստին ես ներկա էի, դատախազությունը պահանջեց 80 ժամ հարկադիր անվճար աշխատանք և երկու շաբաթ պայմանական ազատազրկում։ Դատավճիռը կհրատարակվի 2018 թ. նոյեմբերի 14-ին, սակայն կարող եմ ասել՝ տրամադրություններն այնպիսին էին, որ Իլհամ Աշկինը չի արդարացվի»,-ասաց Մաթո Հախվերդյանը:

Աշկինը մեղադրվում է այն բանի համար, որ նա 2014-ին Ալմելո քաղաքում Մեծ Եղեռնի հուշահամալիրի դեմ կազմակերպված թուրքական հանրահավաքի ժամանակ մի քանի անգամ վանկարկել է «Ղարաբաղը լինելու է հայերի գերեզմանը»: Առաջին ատյանի դատարանը նշանակել էր 120 ժամ հարկադիր անվճար աշխատանք և մեկ ամիս պայմանական ազատազրկում` երկու տարի փորձնական ժամկետով, որն ավելի ծանր պատժամիջոց է, քան պահանջել էր դատախազությունը:

Ալմելո քաղաքում Մեծ Եղեռնի հուշահամալիրի դեմ կազմակերպված թուրքական հանրահավաքի ժամանակ վանկարկել է «Ղարաբաղը լինելու է հայերի գերեզմանը»։ 2014 թվականի հունիսի 1-ին Ալմելոյում տեղի է ունեցել հանրահավաք, որին հիմնականում մասնակցում էին թուրքեր և որն ուղղված էր Ալմելոյի Հայ առաքելական եկեղեցու հողամասում տեղադրված Հայոց ցեղասպանության զոհերի հուշահամալիրի դեմ։ Հոլանդահայ կազմակերպությունները, մասնավորապես Հոլանդահայ կազմակերպությունների ֆեդերացիան (FAON) և Հոլանդիայի Հայ Դատի հանձնախումբը գանգատ էին ներկայացրել հանրահավաքի ընթացքում կատարված հակահայ հայտարարությունների դեմ։