ԵՐԵՎԱՆ, 6 ՀՈԿՏԵՄԲԵՐԻ, ԱՐՄԵՆՊՐԵՍ: Պատանեկան Օլիմպիական խաղերի բաց պաշտոնական արարողության ժամանակ Հայաստանի դրոշակակիրը կլինի լողորդ Արթուր Բարսեղյանը:

«Արմենպրես»-ի հաղորդմամբ` խաղերի բացման պաշտոնական արարողությունը կկայանա մայրաքաղաք Բուենոս Այրեսի կենտրոնում: Մարզիկները մրցապայքարը կսկսեն հոկտեմբերի 7-ին:

Օլիմպիական խաղերում մեր երկիրը ներկայացնող մարզիկները հանդես կգան 7 մարզաձևերում: Մրցավայր են մեկնել ծանրորդներ Կարեն Մարգարյանը (77 կգ) և Լիանա Գյուրջյանը (63 կգ), հունահռոմեական ըմբիշ Սահակ Հովհաննիսյանը (60 կգ), թաեքվոնդոիստ Անդրանիկ Խաչատրյանը (73 կգ), ձյուդոիստ Յուրի Իսրայելյանը (55 կգ), հրաձիգ Հայկ Բաբայանը (10 մ օդամղիչ ատրճանակ), լողորդ Արթուր Բարսեղյանը (50 մ, 100 մ ազատ ոճ և 50մ բատերֆլայ) և գեղարվեստական մարմնամարզուհի Յուլիա Վոդոպյանովան: