Մինչև հաջորդ տարվա սկիզբ բոլոր խոշորացված համայնքները կունենան քաղաքացիների սպասարկման գրասենյակներ
ԵՐԵՎԱՆ, 27 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանի ավելի քան 30 խոշորացված համայնքներում ստեղծվել են քաղաքացիների սպասարկման գրասենյակներ:
Ինչպես տեղեկացնում է «Արմենպրես»-ը, «Քաղաքացիների սպասարկման գրասենյակներ. թափանցիկ, հաշվետու և քաղաքացիամետ» խորագրով միջազգային համաժողովից առաջ լրագրողների հետ զրույցում այս մասին ասաց ՀՀ տարածքային կառավարման և զարգացման նախարարի առաջին տեղակալ Վաչե Տերտերյանը:
«Հայաստանում քաղաքացիների սպասարկման գրասենյակներ սկսել են ձևավորվել դեռևս 5 տարի առաջ, բայց ինտենսիվ այս աշխատաքները սկսեցին իրականացվել վարչատարածքային բարեփոխումների, համայնքների միավորման և խոշորացման գործընթացին զուգահեռ: Եվ այս գրասենյակների նպատակն այն է, որ քաղաքացիները կարողանում եմ օգտվել համայնքի կողմից մատուցվող բոլոր ծառայություններից` լինեն դրանք տեղեկանքներ, հարկային որոշակի գործառույթներ, լիազորագրեր, թույլտվություններ, արտոնագրեր և այլն»,- ասաց Տերտերյանը՝ հավելելով, որ համայնքների տրամադրած բոլոր այս ծառայությունները քաղաքացիները կարողանում են ստանալ մեկ պատուհանից՝ այցելելով այս գրասենյակ: Նրա խոսքով` քաղաքացիների սպասարկման գրասենյակներ կգործեն ևս 10 խոշորացված համայնքներում, իսկ հաջորդ տարվա սկիզբ արդեն բոլոր խոշորացված համայնքներում:
«Այս գրասենյակները ամբողջական մի համակարգ են խոշորացված համայնքի մեջ մտնող բնակավայրերի: Օրինակ` սեպտեմբերի 26-ին բացվել է Ջրվեժի գրասենյակը, և Ձորաղբյուր, Զովք համայնքների բնակիչները առանց Ջրվեժ համայնքի կենտրոն գալու իրենց գրասենյակներում տեղադրված համակարգիչների միջոցով օգտվում են բոլոր նույն ծառայություններից, ինչ Ջրվեժ համայնքում»,- եզրափակեց Տերտերյանը:
Համաժողովը կազմակերպվել էր Գերմանիայի միջազգային համագործակցության ընկերության կողմից իրականացվող «Լավ տեղական ինքնակառավարում Հարավային Կովկասում» ծրագրի շրջանակում:
Համաժողովի նպատակն էր ներկայացնել և քննարկել համայնքապետարանների կողմից վարչական ծառայությունների մատուցման որակի բարելավման ու ստանդարտացման հնարավորությունները, ծառայությունների մշտադիտարկման ու գնահատման գործիքներն ու մեխանիզմները:
Բաժանորդագրվեք մեր ալիքին Telegram-ում