Արշավի հիմքում կանաչ մտածողության, կանաչ գործերի և կանաչ կյանքի գաղափարն է
ԵՐԵՎԱՆ, 21 ՍԵՊՏԵՄԲԵՐԻ, ԱՐՄԵՆՊՐԵՍ: Երևանի կենտրոնում Անկախության օրվա առթիվ կազմակերպվում են տարատեսակ միջոցառումներ և տեղադրված են զանազան թեմատիկ տաղավարներ, որոնցից մեկը քարոզում է առողջ ապրելակերպ և բնության պահպանություն։
«Արմենպրես»-ի հաղորդմամբ՝ Հյուսիսային պողոտայում շարունակում է գործել «կանաչ» տաղավարը և Անկախության տոնին ևս քարոզել անկախություն նաև բնապահպանության ոլորտում։
«Այս ընթացքում, երբ մարդիկ մոտենում են, հետաքրքրվում, ավելի համոզվեցի, որ հասարակությունը սկսել է ավելի շատ արժևորել և գնահատել բնապահպանական հիմնախնդիրներին առնչվող հարցերը։ Շատ խորհրդանշական է, որ Անկախության տոնին ևս քաղաքի կենտրոնում՝ մեր կանաչ տաղավարում խոսում և բարձրաձայնում ենք բնապահպանական կարևոր հարցերի մասին, քարոզում ունենալ առողջ ապրելակերպ»,- «Արմենպրես»-ի հետ զրույցում նշեց Հյուսիսային պողոտայում գտնվող էկո-տաղավարի ներկայացուցիչը։
Հյուսիսային պողոտայում գործող տաղավարում կազմակերպիչները թեքահարթակների օգնությամբ ստեղծել են արևային էներգիա ստանալու իմիտացիա։ Այս բնապահպանության տարածմանը միտված ծրագրի և էկո-արշավների շրջանակներում իրականացվել են տարբեր միջոցառումներ։
«Կանաչ նախաձեռնություններ» արշավն իրականացվում է ՀՀ բնապահպանության նախարարության և ՄԱԿ-ի զարգացման ծրագրերի կողմից։ Արշավի հիմքում կանաչ մտածողության, կանաչ գործերի և կանաչ կյանքի գաղափարն է։ Նպատակն է յուրաքանչյուրին ոգեշնչել և դրականորեն ազդել Հայաստանում երկրի ռեսուրսների կիրառության վրա։
Բաժանորդագրվեք մեր ալիքին Telegram-ում