«Արքայադուստրը սիսեռի հատիկի վրա» ներկայացումը բացօթյա ցուցադրվեց «Երևան` իմ սեր» հիմնադրամի տարածքում
ԵՐԵՎԱՆ, 20 ՍԵՊՏԵՄԲԵՐԻ, ԱՐՄԵՆՊՐԵՍ: «Երևան` իմ սեր» հիմնադրամում սեպտեմբերի 20-ին Խամաճիկների պետական թատրոնը բացօթյա ներկայացում էր կազմակերպել: «Արմենպրես»-ի հաղորդմամբ` միջոցառմանը ներկա էր նաև ՀՀ նախագահ Արմեն Սարգսյանի տիկին Նունե Սարգսյանը: «Այս միջոցառումը տեղի է ունենում «Երևան՝ իմ սեր» հիմնադրամի տարածքում, որը կոչված է ավելի բարեկեցիկ դարձնել երեխաների` հատկապես հաշմանդամություն ունեցող երեխաների կյանքը, և մենք այսպիսի միջոցառումներ շատ կունենանք այստեղ»,- լրագրողների հետ զրույցում նշեց նա:
Նունե Սարգսյանը ընդգծեց, որ ներկայացումն այս անգամ բեմադրվել է հիմնադրամի հարևանությամբ ապրող երեխաների համար:
Նրա խոսքով՝ Խամաճիկների թատրոնում բեմադրվել է իր գրած «Քաչալ ոզնին» հեքիաթը, որը երեխաները շատ են հավանել: «Շուտով նոր ներկայացում ևս կլինի, իսկ այսօր Աննա Էլբակյանը կարծում է, որ «Արքայադուստրը սիսեռի հատիկի վրա» ներկայացումը շատ լավ կդիտվի»,- ասաց ՀՀ առաջին տիկին:
Խամաճիկների պետական թատրոնի գլխավոր ռեժիսոր Աննա Էլբակյանի խոսքով` թատրոնն առաջին անգամ է հիմնադրամի տարածքում ներկայանում: «Այս ներկայացումը շատ սիրում են երեխաները: Թատրոնը պետք է մտնի մարդկանց սրտերի մեջ»,- շեշտեց Էլբակյանը:
«Երևան՝ իմ սեր» հիմնադրամի տնօրեն Արշակ Կարապետյանն էլ հավելեց, որ ներկայացումը անվճար, է և հիմնադրամի հարևանությամբ ապրող երեխաներին բավական հեշտ էր հրավիրել: «Այս երեխաների մեծ մասը ամեն երեկո խաղում է այստեղ: Հիմնադրամը առաջիկայում ծրագրեր ունի՝ կապված երիտասարդների և տարիքով հայրենակիցների համար»,- նշեց Կարապետյանը:
Բաժանորդագրվեք մեր ալիքին Telegram-ում