Ժամանակը Երևանում՝ 11:07:36,   15 Դեկտեմբեր

Խորհրդարանի լուծարման հարցը չի կարող միանձնյա որոշվել. ԱԺ նախագահ


ԵՐԵՎԱՆ, 20 ՍԵՊՏԵՄԲԵՐԻ, ԱՐՄԵՆՊՐԵՍ: ՀՀ Ազգային ժողովի նախագահն ու վարչապետը ամիսը առնվազն երկու անգամ հանդիպելու ու տարբեր հարցեր քննարկելու համաձայնություն ունեն: «Արմենպրես»-ի փոխանցմամբ` այս մասին սեպտեմբերի 20-ին լրագրողների հետ զրույցում հայտնեց ՀՀ ԱԺ նախագահ Արա Բաբլոյանը:

«Որպես օրենսդիր մարմնի ղեկավար, ես միշտ կողմնակից եմ եղել ավելի հաճախ հանդիպել վարչապետի հետ: Մենք ունենք այդ համաձայնությունը, որ գոնե ամիսը երկու անգամ աշխատանքային հանդիպում ունենանք, որ քննարկենք մեր առջև դրված հարցերը, որոնց, որպես ղեկավարներ, պետք է պատասխանենք»,- նշեց Բաբլոյանը:

Խորհրդարանի նախագահն, անդրադառնալով ՀՀ վարչապետ Նիկոլ Փաշինյանի այն հայտարարությանը, թե Հանրապետական կուսակցությունն այլևս չպետք է խոսի արտահերթ խորհրդարանական ընտրությունների անցկացման նպատակահարմարությունից, նշեց, որ տարբեր քաղաքական ուժեր ունեն իրենց տեսակետները:

«Որպես ԱԺ նախագահ, գտնում եմ, որ տարբեր կուսակցություններ, տարբեր քաղաքական ուժեր կարող են ունենալ իրենց մոտեցումները ու համաձայնության կարող են գալ համատեղ քննարկումների արդյունքում: Այդ առումով մենք ստեղծել ենք բոլոր հնարավորությունները, աշխատանքային խմբեր են ստեղծված Ընտրական օրենսգրքի բարեփոխումների շուրջ, որից հետո կարելի է անդրադառնալ այն հարցին, թե ինչպես շարունակել այդ գործընթացը»,- ընդգծեց Արա Բաբլոյանը:

Ինչ վերաբերում է խորհրդարանի հնարավոր լուծարման հարցին, Բաբլոյանը նշեց, որ դա չի կարող լինել նույնիսկ իր միանձնյա որոշումը:

«Դա չի կարող լինել մեկ մարդու կարծիք կամ ցանկություն: Դա պետք է լինի քաղաքական ուժերի քննարկման արդյունք: Եթե դրանք կգան միասնական համաձայնության, ապա այդ քայլին կգնանք: Խորհրդարանն ընտրված է լեգիտիմ ընտրություններով: Ըստ Սահմանադրության՝ խորհրդարանը գործում է, և ես, որպես խորհրդարանի ղեկավար, պետք է ապահովեմ դրա բնականոն գործունեությունը»,- շեշտեց Արա Բաբլոյանը:




Լրահոս

Բոլոր նորությունները    




Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
Яндекс.Метрика
Էջի կարգավորումներ