ԵՐԵՎԱՆ, 20 ՍԵՊՏԵՄԲԵՐԻ, ԱՐՄԵՆՊՐԵՍ: «Հեղափոխական» ճարտարապետությամբ խորհրդային օդանավակայանը, որը ժամանակին շքեղության բարձունքին էր, հիմա ապամոնտաժվում է: «Daily Mail»-ն անդրադարձել է «Զվարթնոց» օդանավակայանի հին մասնաշենքին՝ նշելով, որ այն կարծես մոնոլիտ տիեզերական կառույց լինի, որը խորհրդային տարիների կարևոր արժեքներից էր:

 «Զվարթնոց» օդանավակայանի առաջին տերմինալը բազմիցս ողջունել է Կրեմլի VIP ուղևորներին եւ ԽՍՀՄ ողջ տարածքից եկած այցելուներին: Այժմ այն լքված է, փակի տակ է եւ ապամոնտաժման շեմին: Այն նախկինում ամեն ժամ ընդունում էր ավելի քան 2500 ուղևորի: Նրանց համար կառույցը շքեղություն էր, կենտրոնական աշտարակում գտնվող ռեստորանից գեղեցիկ տեսարան էր բացվում դեպի մայրաքաղաք Երևան:

Հրապարակման մեջ ներկայացվում է «Զվարթնոց» օդանավակայանի հին մասնաշենքի ներկայիս վիճակը: Նշվում է, որ այն անմխիթար վիճակում է, պատերը, պատուհանները վնասված են, հանված չեն խորհրդային ժամանակներից մնացած ցուցանակները:

«Daily Mail»-ը հրապարակման մեջ նշում է, որ օդանավակայանի հին մասնաշենքը բացառիկ ճարտարապետական կառույց է: Բրիտանացի հեղինակավոր ճարտարապետ Թիմ Ֆլինը հույս է հայտնել, որ մայիսյան թավշյա հեղափոխությունից հետո իշխանության եկած նոր, իշխանությունները կորոշեն, որ «Զվարթնոցը» պատմական շինություն է, որն արժե պահպանել: