Ժամանակը Երևանում՝ 11:07:36,   15 Դեկտեմբեր

Ոստիկանները հայտնաբերել են 17 տարի առաջ երկու անձի սպանության մեղադրանքով հետախուզվողին


ԵՐԵՎԱՆ, 19 ՍԵՊՏԵՄԲԵՐԻ, ԱՐՄԵՆՊՐԵՍ: Ոստիկանության քրեական հետախուզության գլխավոր վարչությունում ստացված օպերատիվ տվյալների իրացման արդյունքում Ռուսաստանի Ռամենսկ քաղաքում հայտնաբերվել ու ձերբակալվել է Գեղամ Մաչանյանը։ 

Ինչպես «Արմենպրես»-ին տեղեկացրին ՀՀ ոստիկանության հասարակայնության հետ կապերի և լրատվության վարչությունից, 2001 թվականի հոկտեմբերի 7-ին Երևանի Արցախի փողոցում հրազենով սպանվել էին երկու տղամարդ, որոնցից մեկը՝ ճանապարհային ոստիկան։ Օպերատիվ-հետախուզական միջոցառումների և քննչական գործողությունների արդյունքում բավարար ապացույցներ էին ձեռք բերվել սպանությունը կատարած անձի ինքնության վերաբերյալ։ 2001 թվականի նոյեմբերին որոշում էր կայացվել Գեղամ Մաչանյանին որպես մեղադրյալ ներգրավելու մասին։ Նաև հայտարարվել էր հետախուզում, խափանման միջոցը՝ կալանք։

Էջմիածնում հաշվառված, 47-ամյա Մաչանյանի գտնվելու վայրի մասին տեղեկությունները ստանալուն պես ոստիկանության քրեական հետախուզության գլխավոր վարչության ծառայողները մեկնեցին Ռուսաստան։ Նրանց և Ռուսաստանի ներքին գործերի նախարարության գործընկերների համատեղ աշխատանքի արդյունքում էլ հետախուզվողը հայտնաբերվեց։ 

Այժմ երկու երկրների իրավապահները քննարկում են Մաչանյանի Հայաստան էքստրադիցիայի հարցը։




Լրահոս

Բոլոր նորությունները    




Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
Яндекс.Метрика
Էջի կարգավորումներ