Զարուհի Փոստանջյանը քարոզարշավը շարունակել է Քանաքեռ-Զեյթունում
ԵՐԵՎԱՆ, 16 ՍԵՊՏԵՄԲԵՐԻ, ԱՐՄԵՆՊՐԵՍ: Երևանի ավագանու սեպտեմբերի 23-ի արտահերթ ընտրություններին ընդառաջ՝ Երևանի քաղաքապետի թեկնածու Զարուհի Փոստանջյանը սեպտեմբերի 16-ին նախընտրական քարոզչությունն իրականացրել է Քանաքեռ-Զեյթուն վարչական շրջանում:
Ինչպես «Արմենպրես»-ին տեղեկացրին «Երկիր Ծիրանի» կուսակցության լրատվական ծառայությունից, քարոզարշավը մեկնարկեց «Հաղթանակ» զբոսայգու առջևից ժամը 17:00-ին և տևեց մինչև ուշ երեկո: Զարուհի Փոստանջյանն ավագանու թեկնածուների և քարոզչական խմբի հետ քայլելով համայնքի փողոցներով, բակերով ու այգիներով՝ ողջունում էր քաղաքացիներին, ջերմ ու անկեղծ զրույցի բռնվում անցորդների հետ:
Ավագանու թեկնածուները և քարոզչական խմբի անդամները համայնքի բնակիչներին իրազեկում էին կուսակցության նախընտրական ծրագրի հիմնադրույթների մասին, ընդգծում քաղաքապետի թեկնածու Զարուհի Փոստանջյանի քաղաքական մաքուր անցյալը, մայրաքաղաքը արդարությամբ, սրտացավությամբ և փորձառությամբ կառավարելու պատրաստակամությունը՝ որպես կարգախոս ունենալով իր կենսակերպի սկզբունքները՝ «Արդարություն և օրենք»:
Ամենօրյա երկարատև քարոզարշավի ընթացքում «Երկիր Ծիրանի»-ի նախագահի ուղղակի շփումները երևանցիների հետ ավելի ակնհայտ են դարձնում մարդկանց համակրանքի և վստահության դրսևորումները, օրեցօր ավելանում է նրանց դրական վերաբերմունքը Զարուհի Փոստանջյանին Երևանի քաղաքապետ ընտրելու հարցում, և ամրանում է քաղաքացիների հույսն ու հավատը առ այն, որ Երևանը վերջապես կունենա հոգատար, անկաշառ և օրինապահ քաղաքապետ՝ ի դեմս Զարուհի Փոստանջյանի:
Բաժանորդագրվեք մեր ալիքին Telegram-ում