ԵՐԵՎԱՆ, 13 ՍԵՊՏԵՄԲԵՐԻ, ԱՐՄԵՆՊՐԵՍ: ՀՀ կրթության և գիտության նախարարությունը պարզաբանում է տարածել «Շանթ-2018» զորավարժությունների շրջանակում դպրոցներին ուղարկված շրջաբերականի վերաբերյալ: «Արմենպրես»-ը ներկայացնում է պարզաբանումն ամբողջությամբ.

«ՀՀ կրթության և գիտության նախարարության կողմից դպրոցներին ուղարկված ստանդարտ շրջաբերականը, որը տարածվել է համացանցում, «Շանթ-2018» զորավարժությունների շրջանակում է: Զորավարժությունները միտված են համապատասխան իրավիճակներում ճիշտ ուղերձներ մշակելու, կողմնորոշվելու, իրադրությանը համապատասխան քայլեր ձեռնարկելու գործընթացին: Սույն շրջաբերականը իմիտացիոն բնույթի էր, կատարման և տարածման ենթակա չէր: Սակայն որոշ մարդիկ այն տարածել են՝ առանց նշելու, որ դա արվել է «Շանթ-2018»-ի շրջանակներում՝ հեռացնելով համապատասխան գլխագիրը և դիտավորյալ մանիպուլացնելով հասարակությանը: Մեդիագրագիտության խնդիրները, փաստորեն, նույնպես շարունակում են մտահոգիչ մնալ հասարակության մեջ»:

ԿԳ նախարար Արայիկ Հարությունյանի կողմից նախարարության ենթակայության հանրակրթական ուսումնական հասատատությունների տնօրեններին ուղղված շրջաբերականում կոչ էր արվում սովորողներին առաջարկել գրել զինվորին ոգեշնչող նամակ-շարադրություններ՝ ուղղված ՀՀ և ԼՂՀ զինված ուժերում ծառայող հայ զինվորներին: