ԵՐԵՎԱՆ, 11 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանի ռուսական ռազմակայանի հրետանային ստորաբաժանումների զինծառայողները «Ալագյազ» զորափորձարանում ճամբարային դաշտային հավաքի անցկացման ընթացքում ոչնչացրել են պայմանական հակառակորդի արագաշարժ թիրախները:

Ինչպես «Արմենպրես»-ին տեղեկացրեցին ՌԴ Հարավային ռազմական օկրուգի մամուլի ծառայությունից, մարտական հրաձգության ընթացքում հրետանավորները բարձրլեռնային տեղանքում պայմանական հակառակորդի տակտիկական դեսանտի իջեցումը նմանակող արագ շարժվող ու անշարժ թիրախների խոցման առաջադրանքներ են կատարել: Հրաձգությունն ուղիղ նշանառությամբ իրականացվել Է սահմանափակ տեսանելիության պայմաններում՝ մինչեւ 2 կիլոմետր հեռավորության վրա գտնվող թիրախների վրա:

Ճամբարային հավաքը կավարտվի սեպտեմբերի վերջին՝ յուրաքանչյուր զինծառայողի կողմից հրետանային կարուսելի կատարմամբ, որը ներառում Է հեsտախուզման իրականացումը, մանեւրելը մարտի ընթացքում, քողարկումը եւ պայմանական հակառակորդի հրետանային միջոցների դեմ խաբուսիկ գործողությունների օգտագործումը: Ինչպես նշել Է մամուլի ծառայությունը, ընդամենը զորամիավորման հրետանային ստորաբաժանումների ճամբարային հավաքներին ներգրավված են 300-ից ավելի զինծառայողներ եւ շուրջ 100 միավոր հատուկ ռազմական տեխնիկա: