ԵՐԵՎԱՆ, 30 ՕԳՈՍՏՈՍԻ, ԱՐՄԵՆՊՐԵՍ: Կառավարությունը հավանություն տվեց 2018թ. փետրվարի 16-ին ստորագրված Հայաստանի Հանրապետության կառավարության և Ճապոնիայի կառավարության միջև «Պատմամշակութային ժառանգության գիտահետազոտական կենտրոնի` հնագիտական գտածոների վերականգնման և պահպանման համար սարքավորումների բարելավման ծրագիր» դրամաշնորհի համաձայնագիրը հաստատելու մասին» Հանրապետության նախագահի հրամանագրի նախագծին: «Արմենպրես»-ի փոխանցմամբ, հարցն ընդգրկված էր գործադիրի օգոստոսի 30-ի նիստի՝ չքննարկվող հարցերի թվում և միանգամից արժանացավ հավանության:

Նկատի ունենալով կենտրոնի հնագիտական ֆոնդում պեղումների արդյունքում կուտակված հսկայական քանակի պատմամշակութային արժեքների վերականգնման հրատապությունը և ճարտարապետական կոթողների լավագույն մեթոդներով վերականգնումն ապահովելու համար նյութաբանական հետազոտությունների անհրաժեշտությունը՝ նախարարությունն առաջարկել է ՀՀ և Ճապոնիայի կառավարությունների միջև կնքված JICA դրամաշնորհի շրջանակում նորագույն սարքավորումներով համալրել կենտրոնի հնագիտական վերականգնման լաբորատորիան: