«Սիրում եմ իմ հայրենիքը և դեռևս շատ անելիքներ ունեմ». Օսիպյանը հերքում է հրաժարական տալու և Հայաստանից մեկնելու լուրերը
14:42, 30 Օգոստոս 2018
ԵՐԵՎԱՆ, 30 ՕԳՈՍՏՈՍԻ, ԱՐՄԵՆՊՐԵՍ: Ոստիկանության պետ Վալերիյ Օսիպյանը հերքում է հրաժարական տալու և Հայաստանից հեռանալու մասին լուրերը: «Արմենպրես»-ի փոխանցմամբ, կառավարության նիստից հետո լրագրողների հետ զրույցում Օսիպյանը խորհուրդ տվեց իր հեռանալու մասին լուրեր տարածողներից հետաքրքրվել, թե որտեղից նրանք ունեն նման տեղեկություններ: «Ես սիրում եմ իմ հայրենիքը և դեռևս շատ անելիքներ ունեմ: Հակառակը, տեղեկացված եմ, որ մեր շատ հայրենակիցներ ուզում են վերադառնալ Հայաստան, ինչո՞ւ ես պետք է գնամ»,- ասաց Օսիպյանը:
Մամուլում լուրեր են շրջանառվել, ըստ որոնց՝ Օսիպյանը պատրաստվում է հոկտեմբերին հրաժարական տալ Ոստիկանության պետի պաշտոնից և տեղափոխվել բնակության Եվրոպա:
Բաժանորդագրվեք մեր ալիքին Telegram-ում