ԵՐԵՎԱՆ, 30 ՕԳՈՍՏՈՍԻ, ԱՐՄԵՆՊՐԵՍ: Հայաստանի Հանրապետությունն Ալբանիայի Հանրապետության քաղաքացիների համար սահմանում է առանց մուտքի վիզայի այցելությունների ռեժիմ: «Արմենպրես»-ի փոխանցմամբ, այդ մասին որոշման նախագիծը հաստատվեց կառավարության նիստում:

Նախագծի նպատակն է ազատականացնել մուտքի վիզայի հետ կապված հարաբերությունները Ալբանիայի Հանրապետության հետ և նպաստել այդ երկրի քաղաքացիների` Հայաստանի Հանրապետություն այցերի աճին:

Ակնկալվում է, որ որոշման ընդունումը թույլ կտա Ալբանիայի քաղաքացիներին այցելել և մնալ ՀՀ տարածքում առավելագույնը 180 օր ժամկետով` մեկ տարվա ընթացքում` ազատելով նրանց մուտքի վիզա ձեռք բերելու պահանջից: «Դա ոչ միայն կնպաստի զբոսաշրջության խրախուսմանն ու խթանմանը, այլև նոր սկիզբ կհանդիսանա ժողովուրդների փոխճանաչման, երկկողմ համագործակցության մի շարք նոր ոլորտների ուրվագծման և զարգացման համար»,- ասված է հիմնավորման մեջ:

Ալբանիայի Հանրապետության քաղաքացիները 2010 թվականից ի վեր ազատված են Շենգեն երկրների մուտքի արտոնագրի պահանջից, ինչը վկայում է, որ այդ երկրից անկանոն միգրացիայի կառավարման քաղաքականությունը համապատասխանում է ԵՄ չափանիշներին:

Ալբանիան դեռևս 2013 թվականից ազատել է ՀՀ քաղաքացիներին մուտքի արտոնագրի պահանջից, հետևաբար ՀՀ կառավարության կողմից սույն որոշման ընդունումը հետապնդում է հայ-ալբանական երկկողմ հարաբերություններում փոխադարձության սկզբունքի կիրառման նպատակ։