«Լույս» դաշինքը 111 հոգանոց ցուցակ է ներկայացրել ԿԸՀ
ԵՐԵՎԱՆ, 29 ՕԳՈՍՏՈՍԻ, ԱՐՄԵՆՊՐԵՍ: Երևանի ավագանու արտահերթ ընտրություններին մասնակցելու ցանկություն հայտնած «Լույս» դաշինքն իր 111 հոգանոց ցուցակը ներկայացրեց Կենտրոնական ընտրական հանձնաժողով: «Արմենպրես»-ի փոխանցմամբ` դաշինքի փաստաթղթերը ԿԸՀ է բերել դաշինքի ցուցակի երկրորդ համար, Երևանի ավագանու «Ելք» խմբակցության ղեկավար Դավիթ Խաժակյանը:
«Ընտրություններին մասնակցելու ենք հաղթական տրամադրվածությամբ, որովհետև իմ ձեռքում գտնվում է ցուցակ, որտեղ ներառված են քաղաքացիներ, մասնագետներ, ովքեր կարող են լուծել Երևան քաղաքի խնդիրները: Մեր թեկնածու պարոն Զեյնալյանն անցել է այնպիսի ճանապարհ, որը քաղաքական գործիչների համար եզակի է ՀՀ-ում: Ունի այն գիտելիքներն ու հմտությունները, որով կկարողանա քաղաքում կուտակված խնդիրները լուծել ու ստանձնել քաղաքային տնտեսության այդ մեծ բեռը»,- նշեց Խաժակյանը:
Դավիթ Խաժակյանի խոսքով` իրենք հետաքրքիր մրցակցություն են սպասում: Ինչ վերաբերում է «Ելք» դաշինքին, Խաժակյանը նշեց, որ այն գործում է խորհրդարանում, իսկ քաղաքապետարանում ձևաչափը կպահպանվի մինչև նոր ավագանու առաջին նիստը:
Երևանի ավագանու արտահերթ ընտրություններում «Լույս»-ի ցուցակը կգլխավորի ՀՀ արդարադատության նախարար Արտակ Զեյնալյանը, երկրորդ համարն է Դավիթ Խաժակյանը, 3-րդը` ավագանու «Ելք» խմբակցության անդամ Անի Խաչատրյանը:
ԿԸՀ որոշմամբ՝ ընտրություններին մասնակցող կուսակցությունները պետք է իրենց առաջադրման հայտը ներկայացնեն մինչև օգոստոսի 29-ը, ժամը 18:00-ը:
Բաժանորդագրվեք մեր ալիքին Telegram-ում