10 մետաղական և 146 ոչ մետաղական հանքավայրեր զգուշացվել են
ԵՐԵՎԱՆ, 29 ՕԳՈՍՏՈՍԻ, ԱՐՄԵՆՊՐԵՍ: ՀՀ էներգետիկ ենթակառուցվածքների և բնական պաշարների նախարարությունը ստուգումներ է իրականացրել Հայաստանի Հանրապետության մետաղական և ոչ մետաղական հանքավայրերում:
Ինչպես տեղեկացնում է «Արմենպրես»-ը, օգոստոսի 29-ին պաշտոնավարման 100 օրն ամփոփող մամուլի ասուլիսի ժամանակ այս մասին ասաց ՀՀ էներգետիկ ենթակառուցվածքների և բնական պաշարների նախարար Արթուր Գրիգորյանը և հավելեց, որ հանձնարարություն էր տրվել առաջին հերթին ուսումնասիրել շահագործման ենթակա մետաղական հանքավայրերի վիճակը` արդյոք կատարո՞ւմ են իրեն ստանձնած պայմանագրային պարտավորությունները, արդյոք գործո՞ւմ են օրենքի շրջանակում և արդյոք իրենց գործունեությունը թափանցիկ է:
Գրիգորյանի խոսքով` Հայաստանի Հանրապետությունում կան 27 մետաղական հանքավայրերի շահագործման վերաբերյալ տրված լիցենզիաներ, որից 10-ում հայտնաբերվել են թերություններ:
«Մեր աշխատանքների ընթացքում 27 մետաղական հանքավայրերից 10-ին արվել են զգուշացումներ, քանի որ ուսումնասիրությունը ցույց է տվել, որ շահագործումը իրականացվում է օրենքով սահմանված չափանիշներից դուրս: Իսկ ոչ մետաղական հանքավայրերի առումով մոտավորապես 146 հանքավայրի նույնպես արվել են զգուշացումներ»,- ասաց Գրիգորյանը:
Ըստ նախարարի` զգուշացումով հնարավորություն են տալիս ընդերք օգտագործող ընկերությանը 90 օրվա ընթացքում վերացնելու բոլոր ի հայտ եկած թերությունները և պետության հանդեպ չկատարված պարտավորությունները:
«Եթե 90 օրվա ընթացքում չվերացնեն թերությունները, ապա նրանք կզրկվեն լիցենզիայից»,- ընդգծեց Գրիգորյանը՝ հավելելով, որ նմանատիպ աշխատաոճը լինելու է շարունակական:
Բաժանորդագրվեք մեր ալիքին Telegram-ում