Ոստիկաննությունն ուսումնասիրում է ճանապարհային պարեկային ծառայություն ձևավորելու հարցը
ԵՐԵՎԱՆ, 21 ՕԳՈՍՏՈՍԻ, ԱՐՄԵՆՊՐԵՍ: Հայաստանի Հանրապետության ոստիկանության պետ Վալերի Օսիպյանը տեղին է համարում հանրապետությունում ճանապարհատրանսպորտային պատահարների քանակի վերաբերյալ հանրության շրջանում տիրող մտահոգությունը: Օգոստոսի 21-ին կայացած մամուլի ասուլիսի ընթացքում Վալերի Օսիպյանը հավաստիացրեց, որ այդ խնդիրը իրեն էլ է մտահոգում:
«Ես հիշում եմ, որ Խորհրդային Միության տարիներին բոլոր մարզերում ճանապարհային ոստիկանության ստացիոնար հենակետեր կային: Չի բացառվում, որ մենք այդ հենակետերը վերականգնենք, սակայն դա քննարկման կարիք ունեցող հարց է: Ճանապարհային ոստիկանության կոլեգիալ մարմինների կողմից ուսումնասիրություններից հետո նոր մենք որոշում կկայացնենք՝ արդյոք դրանք մեզ կտան արդյունավետ աշխատանք: Այդ դեպքում մենք դրան կանդրադառնանք և անպայման կվերականգնենք այդ գործընթացը»,- «Արմենպրես»-ի փոխանցմամբ՝ ընդգծեց Օսիպյանը:
Ոստիկանության պետը հավելեց, որ այս պահին ուսումնասիրում են ճանապարհային ոստիկանության հենքի վրա ճանապարհային պարեկային ծառայություն ձևավորելու հարցը: «Պարեկային ծառայությունը իր մեջ ներառելու է վարորդներին զսպելու համալիր գործընթաց, ինչը կնպաստի նրան, որ մենք կունենանք ավելի քիչ պատահարներ և դրանց հետևանքով ավելի քիչ զոհեր ու վիրավորներ»,- մանրամասնեց Վալերի Օսիպյանը:
Բաժանորդագրվեք մեր ալիքին Telegram-ում