Ախուրյանում բացված Ծերերի տանը ապրելու հնարավորություն կունենա խնամքի կարիք ունեցող 27 տարեց
ԳՅՈՒՄՐԻ, 19 ՕԳՈՍՏՈՍԻ, ԱՐՄԵՆՊՐԵՍ : Շիրակի մարզի Ախուրյան համայնքում այսուհետեւ կգործի «Վորտիկ Գյուլբենկյան տարեցների» տունը: Տանը բնակվում են միայնակ կամ անժառանգ, օթևան չունեցող տարեցները: Հաստատությունը բարեգործական է, բացի օթևանից տարցներն այստեղ ստանում են երեքանգամյա սնունդ:
Հաստատությունը կառուցվել է Գերմանիայում բնակվող, Արևմտյան Հայաստանից ներգաղթած Ալբերտ Սեվինսի հիմնադրամի միջոցներով: 4000 քառ. մետր տարածքի վրա կառուցված երեք մասնաշենքերում բնակվելու հնարավորություն կունենան 27 տարեցներ՝ ոչ միայն Շիրակի մարզից, այլև հանրապետության այլ մարզերից, հաստատությունում բնակվելու չափորոշինչներին համապատասխանելու դեպքում:
Ինչպես «Արմենպրես»-ին ասաց ծերերի տան մենեջեր Գևորգ Սարիբեկյանը, Շիրակի մարզից եւ հատկապես Գյումրի քաղաքից նախապատվությունը կտրվի տնակներում բնակվող միայնակ տարեցներին՝ անկախ նրանից ժառանգ ունեն թե ոչ, քանզի գաղափարի հիմնական նպատակն է ևս մեկ տնակից քաղաքն ազատելը:
Տարեցների տունը կրում է բարերարի պապի՝ Վորտիկ Գյուլբենկյանի անունը, ով հայտնի հայ գործարար Գալուս Գուլբենկյանի հորեղբոր որդին է եղել:
Ծերերից շատերն արդեն ավելի քան 5 ամիս է բնակվում են Ծերերի տանը: Նրանց համար սա լավագույն օթևանն է, որտեղ իրենք ոչ միայն ծածկ ունեն ու տաք կերակուր, այլ նաև ճակատագիրը կիսող հարևաններ: Ազատ ժամանակն այսպես ավելի հեշտ է անցնում, ավելին, այստեղ տարեցը հեռու է առօրյա կենցաղային հոգսերից՝ չի մտածում ջեռուցման, Էլեկտրաէներգիայի կամ կենցաղային այլ խնդիրների մասին, իսկ իրեն հասանելիք պետական թոշակը տնօրինում է՝ ինչպես կամենա:
Օգոստոսի 18-ին երեկոյան տեղի ունեցավ Ծերերի տան պաշտոնական բացման արարողությունը, որին ներկա էին բարերան ու ավելի քան 200 հյուրեր՝ աշխարհի տարբեր երկրներից: Կառույցը բացվեց Տերունական աղոթքով ու Գուգարարց թեմի առաջնորդ Տեր Սեպուհ արքեպիսկոպոս Չուլջյան բարեմաղթանքով:
«Այսօր Ալագյազի փեշերին համախմբվել ենք և տոնախմբում ենք այս գեղեցիկ համալիրի՝ Տարեցների տան բացումը: Այսօր շնորհակալություն ենք հայտնում հատկապես Ալբերտ Սեվինսին, ով իր խնայողություններից առաջին կամ երկրորդ բարեգործությունը չէ, որ անում է, շարունակ անում է ու այսօր էլ ավելի հիմնարար մեծ բարերարություն կատարեց՝ կառուցելով այս տունը: Հասկանալի է՝ Գյուլբենկյան գերդաստանի ժառանգներն են, ովքեր հայրենասիրության լավագույն արտահայտությունն այս կերպ են դրսևորում՝ մայր հայրենիքը զորացնել, մայր հայրենիքում՝ հային զորացնել: Հայաստանի զորացումը պայմանավորված է յուրաքանչյուր հայի ազգային ինքնությամբ, գիտակցությամբ և սիրով՝ առ հայրենիք: Բարեգործությունն աստվածային շնորհ է»,-նշեց թեմակալ առաջնորդը:
Բաժանորդագրվեք մեր ալիքին Telegram-ում