Վերաբացվեց Գյումրու Նեկրասովի փողոցը
ԳՅՈՒՄՐԻ, 15 ՕԳՈՍՏՈՍԻ, ԱՐՄԵՆՊՐԵՍ: Հիմնանորոգումից հետո օգոստոսի 15-ին վերաբացվեց Գյումրու Նեկրասովի փողոցը: Մոտ 290 մետր երկարություն ունեցող փողոցն ու դրա մայթերը հիմնանորոգվել են համայնքային բյուջեի միջոցներով: Քաղաքապետ Սամվել Բալասանյանն իր խոսքում կարևորեց երկրորդական փողոցների հիմնանորոգումն ու բարեկարգումը, հատկապես, երբ դա իրականացվում է համայնքային բյուջեի միջոցներով:
Սամվել Բալասանյանը նաև անդրադարձավ այս պահին քաղաքի տարբեր փողոցներում իրականացվող հիմնանորոգման աշխատանքներին՝ միաժամանակ ընդգծելով, որ դեռ շատ փողոցներ են բարեկարգվելու: Թաղի բնակիչներն, իրենց հերթին, շնորհակալություն հայտնեցին քաղաքապետին ու բոլոր այն անձանց, որոնց ջանքերի շնորհիվ իրականացվել են փողոցի հիմնանորոգման և բարեկարգման աշխատանքները: Համայնքային բյուջեի միջոցներով հիմնանորոգվել և այսօր արդեն շահագործման են հանձնվել նաև Մադոյան և Ղուկասյան փողոցները: Ընթացքի մեջ են համայնքային բյուջեի միջոցներով հիմնանորոգվող Հակոբյան փողոցի (Ռուսթավելի փողոցից Շիրազի փողոց) ձգվող հատվածի շինաշխատանքները:
Արմենուհի Մխոյան
Բաժանորդագրվեք մեր ալիքին Telegram-ում