ԵՐԵՎԱՆ, 2 ՕԳՈՍՏՈՍԻ, ԱՐՄԵՆՊՐԵՍ: ՀՀ տնտեսական զարգացման և ներդրումների նախարար Արծվիկ Մինասյանը հանդիպում է  ունեցել Հայաստանի Հանրապետությունում Ճապոնիայի արտակարգ և լիազոր դեսպան Ջուն Յամադայի հետ: Ինչպես «Արմենպրես»-ին տեղեկացրեցին ՀՀ տնտեսական զարգացման և ներդրումների նախարարության տեղեկատվության և հասարակայնության հետ կապերի բաժնից, հանդիպմանը մասնակցել են նախարարի տեղակալ Ավագ Ավանեսյանը, Զբոսաշրջության կոմիտեի նախագահ Հռիփսիմե Գրիգորյանը, նախարարության միջազգային համագործակցության վարչության պետ Արմեն Այվազյանը, Ճապոնիայի դեսպանության երկրորդ քարտուղար Միգումի Մաեկավան։

Ողջունելով դեսպանին և շնորհակալություն հայտնելով Ճապոնիայի կառավարության կողմից մեր երկրին ցուցաբերված աջակցության համար՝ նախարարն անդրադարձել է հայ-ճապոնական առևտրատնտեսական  հարաբերությունների  դրական դինամիկային՝ նշելով, որ մեծ ներուժ կա դրանք նոր մակարդակի բարձրացնելու համար։ Արծվիկ Մինասյանը ներկայացրել է տնտեսության ոլորտում իրականացվող բարեփոխումները, տեղեկացրել Ճապոնիայի միջազգային համագործակցության գործակալության կողմից Հայաստանում իրականացվող ծրագրերի ընթացքի մասին։ Խոսվել է մեր երկրի ներդրումային գրավչության, զբոսաշրջության խթանման ուղղությամբ տարվող աշխատանքների մասին:

Դեսպան Ջուն Յամադան շնորհակալություն է  հայտնել հանդիպման և հարցերի մանրամասն ներկայացման համար։ Անդրադարձ է եղել «Հայաստանի Հանրապետության և Ճապոնիայի միջև ներդրումների խրախուսման և փոխադարձ պաշտպանության մասին» համաձայնագրի վավերացման հարցերին, ինչը խթան կհանդիսանա նոր ներդրումների ներգրավման համար։ Անդրադառնալով զբոսաշրջությանը՝ դեսպանը հավաստել է ճապոնացիների կողմից մեծ հետաքրքրվածությունը Հայաստանով, ինչի մասին վկայում է  նաև զբոսաշրջիկների թվի աճը։

Հանդիպման ավարտին կողմերը ևս մեկ անգամ հավաստել են համագործակցության զարգացման պատրաստակամությունը։