Ժամանակը Երևանում՝ 11:07:36,   29 Մայիս 2022

Կայացավ միջպետական կանոնավոր փոխադրումներ իրականացնող կազմակերպությունների ընտրության մրցույթը

Կայացավ միջպետական կանոնավոր փոխադրումներ իրականացնող 
կազմակերպությունների ընտրության մրցույթը

ԵՐԵՎԱՆ, 31 ՀՈՒԼԻՍԻ, ԱՐՄԵՆՊՐԵՍ: Երևանի հյուսիսային ավտոկայարանում տեղի ունեցավ ՀՀ տարածքից ավտոբուսներով ուղևորների և ուղեբեռների միջպետական կանոնավոր փոխադրումներ իրականացնող կազմակերպությունների ընտրության մրցույթը:

«Արմենպրես»-ի փոխանցմամբ՝ մրցույթին կանոնավոր փոխադրումներ իրականացնելու համար մասնակցության հայտ է ներկայացրել 24 կազմակերպություն։ Փոխադրումների ուղղություններն են. դեպի ՌԴ (37 երթուղի), Ուկրաինա (2 երթուղի), Վրաստան (1 երթուղի), Իրանի Իսլամական Հանրապետություն (1 երթուղի):

 «Մենք բացառեցինք, որ փոխադրումները երկու երկրների միջև ուղղակի կերպով իրականանան: Ունենալու ենք կանոնավոր և ոչ կանոնավոր փոխադրողներ: Այն փոխադրողները, ովքեր տարիներ շարունակ ոչ կանոնավոր փոխադրման անվան տակ աշխատել են և երթուղիներ են շահագործել, դրանց մի մասին այստեղ այսօր տեսնում ենք»,- ասաց ՀՀ տրանսպորտի, կապի և տեղեկատվական տեխնոլոգիաների նախարարության փոխադրումների քաղաքականության բաժնի պետ Դավիթ Մելքոնյանը:  Կարևոր փոփոխություններից Մելքոնյանն առանձնացրեց այն, որ այսուհետ քաղաքացիները պետք է գան ավտոկայարան և մեկնեն հենց ավտոկայարանից:

Մրցույթի ընթացքում գնահատվում է վարորդի աշխատանքային փորձը, տրանսպորտային միջոցի շահագործման և արտադրման տարեթիվը, տեխնիկական վիճակը և սպասարկման հնարավորությունները` օդափոխման համակարգ, նստարաններ, սառնարան և այլն:

Գնահատման հստակ սանդղակ կա` 40 միավորով: Եթե տրանսպորտային միջոցը ամբողջությամբ նոր է, ապա այդ մասով ընկերությունը կստանա 10 միավոր: Եթե վարորդն ունի 10 տարվա աշխատանքային փորձ, ապա կստանա համապատասխանաբար 10 միավոր:  Իսկ եթե մեքենան 10 կամ ավելի տարվա է, ապա այն կստանա 1 միավոր, և այս  հանգամանքը մեծ ազդեցություն է ունենում ընդհանուր գնահատականի վրա:

«Տարբեր բաղադրիչներից բաղկացած մի մեխանիզմ է ձևավորված: Եթե միավորների համապատասխան շեմը ընկերությունը չհաղթահարի, ապա նրան չի թույլատրվի իրականացնել կանոնավոր փոխադրումներ: Մենք պետք է փորձենք հետագայում մեր փոխադրողներին ներկայացնել ՌԴ-ում: Իրենք պետք է միջազգային համաձայնագրի շրջանակներում համապատասխան ավտոկայանների հետ պայմանագրեր կնքեն, որպեսզի ինչպես ՀՀ-ում, այնպես էլ ՌԴ-ում աշխատեն ավտոկայաններից»,- ասաց Մելքոնյանը:

ՀՀ տրանսպորտի, կապի և տեղեկատվական տեխնոլոգիաների նախարարի տեղակալ Արմեն Փամբուկչյանը նշեց, որ փոխադրումների հիմնական ուղղությունը մնում է Ռուսաստանը:

«Մենք պարբերաբար հանդիպում ենք թե ոչ կանոնավոր, թե կանոնավոր փոխադրումներ իրականացնող ընկերությունների ներկայացուցիչների հետ և կազմակերպում ենք հանրային քննարկումներ: Արդյունքում եկել ենք այն եզրահանգմանը, որ սա ամենաճիշտ տարբերակն է»,- ասաց Փամբուկչյանը:

«Արմենպրես»-ի հետ զրույցում գնահատող հանձնաժողովի անդամ Արման Կարապետյանը նշեց, որ ներկայացված մեքենաների պատրաստվածությունը միջին մակարդակի է:

Մեկ շաբաթից պաշտոնապես կհայտարարվի, թե որ կազմակերպությունները որ երթուղիներն են սպասարկելու:  








youtube

Բոլոր նորությունները    


Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]