«Արմաթ» ինժեներական լաբորատորիաների սաները Հայաստանը կներկայացնեն «First Global» ռոբոտների միջազգային մրցույթում
ԵՐԵՎԱՆ, 25 ՀՈՒԼԻՍԻ, ԱՐՄԵՆՊՐԵՍ: «Արմաթ» ինժեներական լաբորատորիաների սաներն օգոստոսի 16-18-ը Հայաստանը կներկայացնեն Մեխիկոյում կայանալիք «First Global» ռոբոտների միջազգային մրցույթում:
«Արմենպրես»-ի մամուլի սրահում հրավիրված ասուլիսում Առաջատար տեխնոլոգիաների ձեռնարկությունների միության (ԱՏՁՄ) գործադիր տնօրեն Կարեն Վարդանյանը նշեց, որ միջազգային մրցույթին Հայաստանը ներկայացնում են «Արմաթ»-ի լավագույն սաները:
«Ռոբոտաշինությունը «Արմաթ» ինժեներական լաբորատորիայի ծրագրի հիմնաքարերից մեկն է: Նախորդ տարվանից մենք սկսեցինք ուժեղացնել այն մոտեցումը, որ մեր սաները մասնակցեն միջազգային մրցույթին՝ դրանով իսկ ապահովելով և՛ փորձի փոխանակում, և՛ Հայաստանի ներկայացում: Մեր թիմը լավ պատրաստված է, երեխաները հետաքրքիր լուծումներով են ներկայանալու: Լուրջ ակնկալիքներ ունենք»,-ասաց Կարեն Վարդանյանը:
«First Global» ռոբոտների միջազգային մրցույթում Հայաստանը ներկայացնող թիմի անդամներն են «Արմաթ» ինժեներական լաբորատորիայի սաներ Նոնա Թելունցը, Լիլիթ Խաչիկյանը, Վահագն Զարգարյանը և նրանց ղեկավար Արմեն Ենոքյանը:
Վահագն Զարգարյանը ներկայացրեց իրենց թիմի պատրաստած ռոբոտը, որը կոնկրետ առաջադրանք է կատարելու:
«Առաջադրանքը հետևյալն է, դաշտում տեղադրվում են նույն չափի 20- 30 խորանարդեր: Ռոբոտը պետք է վերցնի 1-3 խորանարդ, և նետի մոտ 60 սմ բարձրությամբ անցքից այլ տարայի մեջ: Մեր նախագծած ռոբոտը կարող է վերցնել 3 խորանարդ»,-ասաց Վահագն Զարգարյանը:
Նոնա Թելունցը նշեց, որ դեռ աշխատելու տեղ կա, վերջին շտկումներն են անում, սակայն վստահ է, որ մրցույթին ամբողջական պատրաստ կներկայանան:
Հայաստանյան թիմի մասնակցության գործընկեր «Ucom» ընկերության համահիմնադիր և գործադիր տնօրեն Հայկ Եսայանը նշեց, որ «Արմաթ» նախաձեռնությունը տարիներ շարունակ առաջընթաց է ունենում, և իրենք պատրաստ են շարունակել աջակցությունը:
«Այն լուծումները, որոնք ներկայացրել են երեխաները, կարծում եմ, հաջողություններ կունենան: Սա պարզապես մրցույթին մասնակցություն չէ, այլ մեր երեխաները Հայաստանում նոր արդիական լուծում են տվել, ինչը բարձր է գնահատվում մեր կողմից: Տարիները ցույց տվեցին, որ ինժեներական կրթության համար «Արմաթ»-ի գաղափարը լավ հնարավորություն է ու լուրջ խթան»,-ասաց Հայկ Եսայանը:
«Ամերիաբանկի» ՏՏ և ավտոմատացման վարչության ղեկավար Շավարշ Ոսկանյանը նույնպես կարևորեց նման նախաձեռնություններին աջակցելը:
«Շատ ուրախ ենք, որ մեր երեխաները Հայաստանը ներկայացնում են միջազգային հեղինակավոր մրցույթում: Համոզված եմ, որ լավ ցուցանիշներով կվերադառնան: «Ամերիաբանկ»-ն իր գործունեության մեջ մշտապես ներդնում է նոր տեխնոլոգիաներ և կարևորում է նման նախաձեռնությունները, հատկապես, երբ երիտասարդ սերունդը ժամանակակից տեխնոլոգիաների մեջ հմտանալու, նոր գիտելիքներ ձեռք բերելու հնարավորություն է ստանում: Մեծ հաճույքով միացել ենք այս նախաձեռնությունը»,-ասաց Շավարշ Ոսկանյանը:
«First Global»-y ռոբոտների միջազգային մարտահրավեր է, որին մասնակցում են 14-18 տարեկան պատանիներ շուրջ 160 երկրից: Մրցույթի նպատակն է միավորել պատանիներին, ոգեշնչել նրանց տեխնոլոգիաների և նորարարության հնարավորություններով, ստեղծել համագործակցության հարթակներ՝ գլոբալ խնդիրների ու կյանքի որակի բարձրացմանն ուղղված լուծումներ ստեղծելու համար:
Բաժանորդագրվեք մեր ալիքին Telegram-ում