Ժողովրդավարությունը Հայաստանի համար ոչ թե արտաքին քաղաքական կողմնորոշում է, այլ՝ համոզմունք. Նիկոլ Փաշինյան
ԵՐԵՎԱՆ, 20 ՀՈՒԼԻՍԻ, ԱՐՄԵՆՊՐԵՍ: Ժողովրդավարությունը Հայաստանի համար ոչ թե արտաքին քաղաքական կողմնորոշում է, այլ իր համոզմունքն է: Հրավիրված մամուլի ասուլիսում ՀՀ վարչապետ Նիկոլ Փաշինյանը նշեց, որ այս մոտեցումները ներկայացրել է Բրյուսել կատարած այցի ընթացքում նախատեսված հանդիպումների ժամանակ:
«ԵՄ-ն երկար տարիներ ասել է, որ Արևելյան գործընկերության երկրների հետ ինքը հարաբերվում է, պայմանական ասած, «ավելին ավելիի դիմաց» բանաձևով: Ավելին վերաբերում է այն հռչակված արժեքներին, որը բոլորիս հայտնի է՝ ժողովրդավարություն, կոռուպցիայի դեմ պայքար, անկախ դատական համակարգ և այլն: Մինչև Բրյուսել իմ կատարած այցը, եղել է հայտարարություն այն մասին, որ ԵՄ-ն պատրաստվում է Հայաստանին աջակցել ինչ-որ ձևով: Ես իմ տարակուսանքն եմ արտահայտել, որ ԵՄ-ի առաջարկած բանաձևը չի աշխատում ԵՄ-ի քաղաքականության համար: Ինձ համար տարակուսելի է այն, որ ԵՄ մի շարք գործընկերներ ինձ հետ հանդիպումներում ասում են, որ ինչպես նախկինում, այսօր էլ Հայաստանում ակնկալում են փոփոխություններ: Ինձ համար զարմանալի է, որ ԵՄ-ում կան պաշտոնյաներ, ովքեր չեն նկատում Հայաստանում կատարվող փոփոխությունները»,- «Արմենպրես»-ի հաղորդմամբ ասաց ՀՀ վարչապետը:
Իրավիճակն ավելի պարզեցնելու համար Նիկոլ Փաշինյանը ներկայացրել է կոնկրետ օրինակ: Նա նշել է, որ այսօրվա կառավարությունը 2 կամ մեկ ամսում առանց որևէ հավելյալ լումա ծախսելու կոռուպցիայի դեմ պայքարում արել է ավելին, քան ԵՄ-ի ու Հայաստանի նախկին կառավարությունների համագործակցության ընթացքում տեղի է ունեցել՝ ծախսելով միլիոնավոր եվրոներ: Նոր կառավարությունն անկախ դատական համակարգ ունենալու համար մեկ շաբաթում արել է ավելին, քան նախկինում է արվել:
«Սա կարելի էր ասել բազմաթիվ կետերի մասին: Մենք հանուն ֆինանսական աջակցության ոչինչ չենք արել, մենք ինչ արել ենք մեր ժողովրդի տված մանդատն իրականացնելու համար է: Սա հստակ պետք է լինի ու մեր ուղերձը հղել ենք մեր գործընկերներին»,-ասաց Նիկոլ Փաշինյանը:
Բաժանորդագրվեք մեր ալիքին Telegram-ում