«Բիզնես Արմենիա»-ի տնօրենն իշխանափոխությունից հետո նկատում է օտարերկրյա ներդրողների հետաքրքրության աճ Հայաստանի նկատմամբ
ԵՐԵՎԱՆ, 20 ՀՈՒԼԻՍԻ, ԱՐՄԵՆՊՐԵՍ: «Բիզնես Արմենիա»-ի գործադիր տնօրեն Արմեն Ավակ Ավակյանը Հայաստանում իշխանափոխությունից հետո օտարերկրյա ներդրողների հետաքրքրության բարձրացում է նկատում:
«Արմենպրես»-ի հաղորդմամբ՝ լրագրողների հետ հանդիպմանը նա նշեց՝ սակայն գործնական քայլերի համար ներդրողները դեռ սպասում են խորհրդարանական ընտրություններին:
«Հայաստանում օտարերկրյա ներդրողների կողմից հետաքրքրությունը շատացել է իշխանափոխությունից հետո: Սակայն մինչ այդ հետաքրքրությունը դառնա ներդրում, կա ակնկալիք ընտրություններից: Ցանկացած ընտրություններից առաջ ցանկացած երկրում միշտ կա ներդրողների կողմից նման վիճակ՝ հասկանալու, թե քաղաքական դաշտն ինչպես է ձևավորվելու»,-ասաց Արմեն Ավակ Ավակյանը:
Այն հարցումների քանակը, որ ստանում են արտասահմանից, միանշանակ բարձրացել է: Հուսով են, որ դա շատ շուտով կդառնա կոնկրետ ներդրում:
Այս տարվա համար «Բիզնես Արմենիա»-ն թիրախավորել է 46 մլն դոլարի ներդրում: Հիմնական ոլորտներն են արտադրությունը, վերամշակումը, թեթև արդյունաբերությունը, դեղագործությունը:
Բաժանորդագրվեք մեր ալիքին Telegram-ում