Բուլղարիայում հայկական տարազների ցուցադրություն է կազմակերպվել
ԵՐԵՎԱՆ, 2 ՀՈՒԼԻՍԻ, ԱՐՄԵՆՊՐԵՍ: Բուլղարիայի մայրաքաղաք Սոֆիայի Ազգագրության թանգարանի ցուցասրահում հունիսի 28-ին բացվեց «Հիշողություններ Աղթամարից» խորագիրը կրող հայկական տարազների լուսանկարների ցուցադրությունը: Միջոցառման կազմակերպիչներն են Բուլղարիայի Գիտությունների ակադեմիայի Ազգագրական հետազոտություների ինստիտուտը և Հայ բարեգործական ընդհանուր միության Սոֆիայի մասնաճյուղը: Այս մասին «Արմենպրես»-ին տեղեկացրին ՀՀ արտաքին գործերի նախարարության լրատվության և հանրային դիվանագիտության վարչությունից:
Թուրքահայ Ջուլիա Մուտլուի հեղինակած հայկական տարազների հավաքածուն ներկայացված է Վանի տարածաշրջանի հայկական եկեղեցիների, հուշարձանների և մի շարք բնապատկերների ներքո: Լուսանկարների հեղինակն է ազգությամբ քուրդ Այթաչ Արազ Սելջուկը: Հայկական ավանդական հագուստները ցուցադրում են տարբեր տարիքի թուրքեր:
Ցուցահանդեսի պաշտոնական բացման արարողությանը մասնակցեցին Բուլղարիայում ՀՀ դեսպան Արմեն Սարգսյանը, Սոֆիայի հայ համայնքի և բուլղար հասարակության ներկայացուցիչներ, արվեստագետներ:
Սոֆիայում երկօրյա ցուցադրությունից հետո լուսանկարները ներկայացվել են նաև Բուլղարիայի հայաշատ Պլովդիվ քաղաքում:
Բաժանորդագրվեք մեր ալիքին Telegram-ում