Էմին Երիցյանն անցած 20 տարիների ամենամեծ ձեռքբերում համարում է տեղական իշխանությունների պաշտպանվածությունը
ԵՐԵՎԱՆ, 25 ՀՈՒՆԻՍԻ, ԱՐՄԵՆՊՐԵՍ: Հայաստանի համայնքների միության գրասենյակում հունիսի 25-ին կայացել է հանդիպում Եվրոպայի խորհրդի փորձագետների հետ: Ինչպես «Արմենպրես»-ին տեղեկացրեցին Հայաստանի համայնքների միության հաղորդակցության և հանրային կապերի ծառայությունից, «SOSE international» կազմակերպության փորձագետներ Վիերի Սերիանիի, Ֆրանսեսկո Փորսելիի, Մարկո Ստրադիոտտոյի հետ հանդիպմանը քննարկվեցին համայնքների խոշորացման, Ֆինանսական համահարթեցման, տարածքային կառավարման և տեղական ինքնակառավարման փոխհարաբերությունների հետ կապված խնդիրներ:
Հայաստանի համայնքների միության նախագահ Էմին Երիցյանը, ներկայացնելով միության գործունեությունը, գործառույթները, նշել է, որ իրենց հիմնական նպատակն է ՀՀ սահմաններում և սահմաններից դուրս համայնքների միասնական ձայնը ներկայացնելը:
« Անցած 20 տարիներին մեր հիմնական ձեռքբերումը տեղական իշխանությունների պաշտպանվածությունն է, քանի որ գալով խորհրդային համակարգից՝ մեզ մոտ կա այն մտայնությունը, որ տեղական իշխանությունը կենտրոնական իշխանության շարունակությունն է»,-ասել է Էմին Երիցյանը՝ իր մտահոգությունը հայտնելով, որ 2009 թվականից ի վեր համայնքներին նոր լիազորություններ և ֆինանսական աղբյուրներ չեն փոխանցվել:
Փորձագետներին հետաքրքրեց, թե արդյոք կո՞ղմ են խոշորացմանը, Էմին Երիցյանը պատասխանել է, որ վարչատարածքային փոփոխությունների ժամանակ կարևոր է բնակչության կարծիքը հաշվի առնելը։
«Ընդունում ենք նաև, որ, անկախ համայնքի բնակչության կարծիքից, վարչատարածքային փոփոխությունը կառավարության բացառիկ իրավասությունն է: Բայց միևնույն ժամանակ ցանկացած խոշորացման ժամանակ պետք է երաշխավորվի համայնքների լսված լինելու իրավունքի ապահովումը: Սահմանադրությունը պահանջում է որոշում կայացնելուց առաջ լսել համայնքի կարծիքը: Սակայն վերջին երկու խոշորացման փուլերն իրականացվեցին առանց բնակչության կարծիքը հաշվի առնելու: Խոշորացումը չպետք է ինքնանպատակ լինի»,-ասել է նա:
Բաժանորդագրվեք մեր ալիքին Telegram-ում