ԵՐԵՎԱՆ, 25 ՀՈՒՆԻՍԻ, ԱՐՄԵՆՊՐԵՍ:  ՀՀ էնեգետիկ ենթակառուցվածքների և բնական պաշարների նախկին փոխնախարար Հայկ Հարությունյանը ստեղծել է Էներգետիկայի հայկական գործակալություն: Նորաստեղծ կառույցի գրանցման դիմումը ներկայացվել է հունիսի 22-ին, որը տարվա ամենաերկար օրն է՝ խորհրդանշելով վերականգվող ռեսուրսներից հատկապես արևի նպատակային և արդյունավետ օգտագործումը:  «Գործակալության գործունեությունը ուղղված է լինելու Հայաստանում կայուն էներգետիկայի ոլորտի ծրագրերի իրականացմանը: Ներկայում թիմ ենք հավաքում, ինքս զբաղվելու եմ ոլորտի երկարաժամկետ ռազմավարական ծրագրերի մշակումով և իրականացումով, առաջնային ծրագրերի իրականացումով, որպեսզի ապացուցվեն տնտեսական մոդելները, որոնք հող կնախապատրաստեն մասնավոր սեկտորի կողմից ոլորտի զարգացման համար»,-«Արմենպրես»-ի փոխանցմամբ՝ ֆեյսբուքյան ուղիղ հեռարձակման ձևաչափով տեղեկացրեց Հայկ Հարությունյանը:

Փորձագետի խոսքով՝ տասնյակից ավելի ծրագրեր արդեն նախանշվել են իրենց կողմից, որոնք ուղղված են լինելու գյուղական համայնքներում մաքուր էներգետիկայի հասանելիության բարձրացումից մինչև Հայաստան-Եվրամիություն Համապարփակ և ընդլայնված գործընկերության համաձայնագրի իրականացման աջակցմանը, քանի որ ոլորտին առնչվող երկկողմ մեծ օրակարգ կա, հետևաբար՝ փորձագիտական աշխատանքի լայն հնարավորություն: