ՀՀ ԱԺ պատվիրակությունը հանդիպել է Բուլղարիայի խորհրդարանի նախագահի տեղեկալի հետ
ԵՐԵՎԱՆ, 21 ՀՈՒՆԻՍԻ, ԱՐՄԵՆՊՐԵՍ: Պաշտոնական այցով հունիսի 19-ից Բուլղարիայում է գտնվում ՀՀ Ազգային ժողովի Հայաստան-Բուլղարիա պատգամավորական բարեկամական խմբի պատվիրակությունը՝ խմբի ղեկավար Ջեմմա Բաղդասարյանի գլխավորությոամբ:
Ինչպես հաղորդում է «Արմենպրես»-ը, պատվիրակության կազմում են ՀՀ Ազգային ժողովի նախագահի տեղակալ Միքայել Մելքումյանը, պատգամավորներ՝ Արմենուհի Կյուրեղյանը, Արամ Սարգսյանը և Միհրան Հակոբյանը: Սոֆիայում հայկական պատվիրակությանը միացել է նաև Բուլղարիայում ՀՀ դեսպան Արմեն Սարգսյանը:
Հունիսի 20-ի առավոտյան ԲՀ Ժողովրդական ժողովի շենքում տեղի ունեցավ պատվիրակության հանդիպումը ԲՀ խորհրդարանի նախագահի տեղեկալ Էմիլ Խրիստովի հետ:
ՀՀ պատվիրակությանն ուղղված ողջույնի խոսքում Է. Խրիստովն ընդգծեց երկու ժողովուրդների միջև ձևավորված վաղեմի բարեկամությունն ու մշակութային առնչությունները, որոնք ամուր հիմք են հանդիսանում հայ-բուլղարական հարաբերությունների զարգացման համար: Է. Խրիստովը կարևորեց խորհրդարանական դիվանագիտության դերը երկկողմ հարաբերությունների ամրապնդման և համագործակցության խորացման գործում:
ՀՀ ԱԺ պատվիրակության ղեկավար Ջ. Բաղդասարյանն իր շնորհակալական խոսքն ուղղեց բուլղարական կողմին այցը բարձր մակարդակով կազմակերպելու և ջերմ հյուրընկալություն ցուցաբերելու համար: Նա բարձր գնահատեց Բուլղարիայի ջանքերը երկկողմ հարաբերությունների ամրապնդման ուղղությամբ՝ շնորհակալություն հայտնելով ԲՀ խորհրդարանին՝ օրերս «ՀՀ - ԵՄ համապարփակ և ընդլայնված գործընկերության համաձայնագիրը» վավերացնելու համար:
Ջ. Բաղդասարյանը կարևորեց խմբի առաջին այցը Բուլղարիա՝ հույս հայտնելով, որ սա ամուր հիմք կհանդիսանա երկկողմ քաղաքական, առևտրատնտեսական, ինչպես նաև մշակութային և հումանիտար ոլորտներում համագործակցության հետագա զարգացման համար: Այս համատեքստում նա առանձնացրեց երկու երկրների խորհրդարանների միջև գործնական համագործակցության նշանակությունը երկու երկրներում ժողովրդավարական գործընթացների խրախուսման գործում:
Երկու երկրների բարեկամական խմբերի միջև կայացած հանդիպմանը քննարկվեցին կողմերի միջև համագործակցության խթանման հետ կապված հարցեր: Երկուստեք կարևորվեց տարբեր ոլորտներում ծրագրերի իրականացման անհրաժեշտությունը: Քննարկվեցին քաղաքական կապերի զարգացմանը, միջազգային կազմակերպություններում փոխադարձ աջակցությանը, տնտեսական բնագավառներում ենթակառուցվածքային նախագծերի իրականացմանը, ապրանքաշրջանառության ավելացմանը, ապակենտրոնացված համագործակցությանը, հայ համայնքային կառույցների հետ բուլղար պատգամավորների կապերի ընդլայնմանն առնչվող հարցեր:
Հանդիպման ավարտին ստորագրվեց «Հայաստանի Հանրապետության Ազգային ժողովի Հայաստան - Բուլղարիա բարեկամական խմբի և Բուլղարիայի Հանրապետության Ժողովրդական ժողովի Բուլղարիա - Հայաստան բարեկամական խմբի միջև համագործակցության մասին» հուշագիրը:
Այցը շարունակվելու է մինչև հունիսի 23-ը:
Բաժանորդագրվեք մեր ալիքին Telegram-ում