Երիտասարդ ռեժիսորներն ու սցենարիստները իրենց կինոնախագծերը կներկայացնեն «ՍինեՄիտք» ծրագրի շրջանակում
ԵՐԵՎԱՆ, 20 ՀՈՒՆԻՍԻ, ԱՐՄԵՆՊՐԵՍ: «Ոսկե ծիրան» կինոփառատոնի ընթացքում այս տարի կյանքի կկոչվի GAIFF pro կինոյի զարգացման հարթակը, որի կարևոր մասն է կազմում «ՍինեՄիտք» (CineThink) ծրագիրը: Այն ողջ տարին ձգվող միջոցառումների շարք է, որի նպատակն է զարգացնել Հայաստանի կինոարտադրությունը: «Արմենպրես»-ի հաղորդմամբ` «ՍինեՄիտք» (CineThink)-ը յուրօրինակ համագործակցություն է GAIFF Pro-ի և Think դասընթացների ծրագրի միջև: Տասը մասից բաղկացած կուրսը նախատեսված է տասը կինոռեժիսորի/սցենարիստի համար, ովքեր փորձում են իրականացնել իրենց առաջին կամ երկրորդ լիամետրաժ ֆիլմը:
Ծրագրի մասին հունիսի 20-ին լրագրողների հետ հանդիպմանը խոսեց GAIFF pro հարթակի ղեկավար Մելիք Կարապետյանը:
«Ապրիլից սկսել ենք տասը հայկական նախագծի վերաբերյալ տասը շաբաթանոց դասընթաց անցկացնել: Հունիսի 30-ին դասընթացների մասնակցիները կարող են իրենց կինոպատմությունները ներկայացնել հանրությանը: Այդ օրը կիրականացվի դրամահավաք և պոտենցիալ հովանավորները կարող են ֆինանսապես առաջակցել նախագծերին` դրանց զարգացման հնարավորություն ընձեռելով»,- նշեց Կարապետյանը:
«ՍինեՄիտք» ծրագիրն իրականացվում է ԵՄ ֆինանսավորմամբ` «ՔՀ Կամուրջ» ծրագրի շրջանակում:
Բաժանորդագրվեք մեր ալիքին Telegram-ում