ԵՐԵՎԱՆ, 19 ՀՈՒՆԻՍԻ, ԱՐՄԵՆՊՐԵՍ: Եվրադատարանը ադրբեջանցի ընդդիմադիր լրագրող Աֆղան Մուխտարլիի բողոքի հիման վրա ուսումնասիրություն է սկսել նրա գործի մի քանի դրվագների շուրջ:

Այս մասին, ինչպես հաղորդում է «Արմենպրես»-ը, հայտնում է ադրբեջանական «Թուրան» լրատվական գործակալությունը:

Մարդու իրավունքների եվրոպական դատարանը (ՄԻԵԴ) ուսումնասիրություն է իրականացնելու Մուխտարլիի ձերբակալության հանգամանքների, մինչև դատը նրա ձերբակալության, ապօրինաբար լրագրողի հեռախոսը գաղտնալսելու և առևանգման ճանապարհով Վրաստանից Ադրբեջան տեղափոխելու դեպքերի հետ:

Լրագրող Աֆղան Մուխթարլին հայտնի է որպես ադրբեջանական իշխանությունների վարած քաղաքականության քննադատ: 2015 թվականից ի վեր նա ստիպված է եղել բնակություն հաստատել Թբիլիսիում: 2017 թվականի մայիսի 29-ին լրագրողն անհետացել էր Թբիլիսիում, ինչի կապակցությամբ նրա ընտանիքը դիմել էր ոստիկանություն: Ավելի ուշ նա կապ էր հաստատել իր փաստաբան Էլչին Սադիգովի հետ՝ վերջինիս տեղեկացնելով, որ իրեն տեղափոխել են Բաքու: Լրագրողին առաջադրվել էր մեղադրանք՝ սահմանն ապօրինի հատելու կապակցությամբ:

Աֆղան Մուխտարլիի ձերբակալությունը, որպես քաղաքական ձերբակալություն են բնութագրել բազմաթիվ միջազգային կազմակերպություններ և պահանջել ազատ արձակել լրագրողին, սակայն ալիևյան ռեժիմը, ով ամեն գնով սաստում է խոսքի ազատությունը, հրաժարվում է հարգել մարդու իրավունքների վերաբերյալ միջազգային պարտավորություններն ու շարունակում է անօրինական ձերբակալությունները:

Ադրբեջանական դատարանը Աֆղան Մուխտարլիին դատապարտել է 6 տարվա ազատազրկման: