Հայ-ամերիկյան և հայ-իտալական համատեղ արշավախմբերը հետազոտելու են Վայոց ձորի և Կոտայքի մարզի հուշարձանները
ԵՐԵՎԱՆ, 15 ՀՈՒՆԻՍԻ, ԱՐՄԵՆՊՐԵՍ: Հայ-ամերիկյան և հայ-իտալական համատեղ արշավախումբը հնագիտական պեղումներ է սկսել Վայոց ձորի և Կոտայքի մարզի հուշարձաններում: Հայ-Իտալական արշավախմբի ղեկավար Ռոբերտո Դանը, ով ուրարտական հնագիտության ուսումնասիրությամբ է զբաղվում, «Արմենպրես»-ի հետ զրույցում փաստեց, որ ուրարտական հնագիտության տեսանկյունից բավական հետաքրքիր պոտենցիալ ունեն հատկապես Վայոց ձորի և Կոտայքի հնավայրերը:
«Այդ տարածքները հնագիտորեն այնքան էլ լավ ուսումնասիրված չեն: Վանի թագավորությունը հայկական լեռնաշխարհում ձևավորված առաջին պետական կազմավորումն է և իր ձևավորման և տարածման մանրամասները շատ հետաքրքիր են»,-ասաց նա:
Հայ-Իտալական համատեղ արշավախմբի ղեկավարի խոսքով՝ Սոլակ 1 հնավայրում մասնագետները ուսումնասիրում են խեցեղենը, ապա ճարտարապետությունը:
Հայ-ամերիկյան արշավախմբից Տիֆանի Սպիդոնն էլ, ով երկաթի դարի մասնագետ է և հիմնականում զբաղվում եմ ռազմական լանդշաֆտի ուսումնասիրությամբ, կարծում է, որ այդ տեսակ լանդշաֆտների տեսանկյունից Հայաստանը բավական հետաքրքիր մորֆոլոգիա ունեցող երկիր է:
2017 թվականին հայ-իտալական և հայ-ամերիկյան համատեղ արշավախմբերը հետախուզական-դաշտային աշխատանքների ժամանակ, ուսումնասիրելով Եղեգիս գետի հովիտը, 30 հուշարձան են հայտնաբերել, որոնք թվագրվում են բրոնզի դարից մինչ միջնադար ընկած ժամանակահատվածին:
Սոլակ 1 հնավայրում հնագետները պեղումներ են իրականացնում 2013 թվականից:
Բաժանորդագրվեք մեր ալիքին Telegram-ում