ԳԱՎԱՌ, 14 ՀՈՒՆԻՍԻ, ԱՐՄԵՆՊՐԵՍ: Գեղարքունիքի մարզի Լանջաղբյուր գյուղում մեկնարկել են խմելու ջրատարի արտաքին ցանցի կառուցման եւ օրվա կարգավորիչ ջրամբարի կապիտալ նորոգման աշխատանքները:
Ինչպես «Արմենպրես»-ին տեղեկացրեց Լանջաղբյուրի գյուղապետ Յուրիկ Բաղդասարյանը, ծրագիրն իրականացվում է ՀՀ կառավարության կողմից տրամադրված սուբվենցիայի եւ Լանջաղբյուրի գյուղապետարանի միջոցների հաշվին: Ծրագրի ընդհանուր արժեքը կազմում է 8 միլիոն 950 հազար դրամ, որի 60 տոկոսը ներդրելու է ՀՀ կառավարությունը, 40 տոկոսը՝ Լանջաղբյուրի գյուղապետարանը: Ծրագրի իրականացման ավարտից հետո Լանջաղբյուրում մատակարարվող խմելու ջրի քանակությունը, որն այժմ հասնում է մինչեւ 20 լիտր վայրկյանի, կավելանա եւս 5-7 լիտր վայրկյանով: Կառուցվող ջրատարի արտաքին ցանցի երկարությունը կազմում է 1400 գծամետր, որը պետք է միանա արտաքին ցանցին: Վերցվելու է Սպիտակասարի աղբյուրի ջուրը, որը գյուղից գտնվում է մոտ 12 կիլոմետր հեռավորությամբ:

«Հիմնանորոգվելու է օրվա կարգավորիչ ջրամբարը, իսկ ջրամբար մտնող ջրաքանակին ավելանալու է եւս 5-7 լիտր վայրկյան ջուր, ինչը հնարավորություն է տալու, որպեսզի գյուղի տնտեսությունների ջրամատակարարումն ավելանա եւս մի քանի ժամով: Շինարարական աշխատանքների ավարտի ժամկետ է սահմանված մինչեւ այս տարվա հոկտեմբեր ամիսը»,-հավաստեց համայնքի ղեկավարը:

Խոսրով Խլղաթյան