Ժամանակը Երևանում՝ 11:07:36,   18 Հոկտեմբեր

Հայաստանի և Էստոնիայի ԱԳՆ-ների միջև անցկացվել են քաղաքական խորհրդակցություններ


ԵՐԵՎԱՆ, 13 ՀՈՒՆԻՍԻ, ԱՐՄԵՆՊՐԵՍ: Երևանում hունիսի 11-ին տեղի են ունեցել  քաղաքական խորհրդակցություններ Հայաստանի Հանրապետության և Էստոնիայի Հանրապետության արտաքին գործերի նախարարությունների միջև: Ինչպես «Արմենպրես»-ին տեղեկացրին ՀՀ արտաքին գործերի նախարարության մամուլի, տեղեկատվության և հասարակայնության հետ կապի վարչությունից, հայկական պատվիրակությունը գլխավորել է  ՀՀ ԱԳՆ Եվրոպայի վարչության պետ Գագիկ Ղալաչյանը, էստոնականը՝ Էստոնիայի պատվիրակությունը՝ ԱԳՆ Արևելյան Եվրոպայի և Կենտրոնական Ասիայի վարչության պետ Մարտին Ռոջերը: Խորհրդակցությանը մասնակցել է նաև Էստոնիայում ՀՀ դեսպան Տիգրան Մկրտչյանը:

Խորհրդակցությունների ընթացքում քննարկվել են երկկողմ քաղաքական, տնտեսական և մշակութային ոլորտներում հարաբերությունների ընդլայնման հեռանկարները։ Ընդգծվել է  Հայաստանում և Էստոնիայում պարբերաբար անցկացվող մշակութային միջոցառումների կարևորությունը։

ՀՀ-ԵՄ հարաբերությունների զարգացման համատեքստում Գագիկ Ղալաչյանն ընդգծել է  Էստոնիայի կողմից Համապարփակ և ընդլայնված գործընկերության համաձայնագիրն առաջինը վավերացնելու հանգամանքը՝ հույս հայտնելով, որ վավերացման գործընթացը սահուն կերպով կշարունակվի նաև ԵՄ անդամ մյուս երկրներում։ Նա հավելել է, որ ս.թ. հունիսի 1-ից համաձայնագրի դրույթներն արդեն սկսել են մասամբ կիրարկվել Հայաստանում։

Խորհրդակցությունների մասնակիցներին ընդունել է  նաև ԱԳ նախարարի տեղակալ Կարեն Նազարյանը։ Հանդիպմանը կողմերն անդրադարձ են  կատարել երկուստեք հետաքրքրություն ներկայացնող տարածաշրջանային և միջազգային օրակարգի մի շարք հարցերի: Էստոնական կողմի խնդրանքով Կարեն Նազարյանը ներկայացրել է ԼՂ հիմնախնդրի կարգավորման գործընթացը։

 




Լրահոս

Բոլոր նորությունները    




Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
Яндекс.Метрика
Էջի կարգավորումներ