Դինքի սպանության գործով կասկածյալ երկու ոստիկան ազատ է արձակվել
ԵՐԵՎԱՆ, 13 ՀՈՒՆԻՍԻ, ԱՐՄԵՆՊՐԵՍ: Ստամբուլի հայկական «Ակոս» պարբերականի հիմնադիր Հրանտ Դինքի սպանության գործով հերթական դատական նիստում որոշում է կայացվել պայմանական ազատ արձակել երկու կասկածյալի:
Ինչպես հաղորդում է «Արմենպրես»-ը՝ վկայակոչելով «Ակոս»-ը, պայմանական ազատ են արձակվել Դինքի սպանության ժամանակ Սամսունի ոստիկանության աշխատակից Յաքուփ Քուրթարանն ու Տրապիզոնի ոստիկանության հետախուզական բաժնի աշխատակից Օզքան Մումջուն:
Ստամբուլի ծանր հանցագործությունները քննող դատարանի կայացրած վճռով կասկածյալներին արգելվել է երկրից դուրս գալ: Նրանք կմասնակցեն հետագա հարցաքննություններին ու դատական նիստերին:
Ստամբուլի «Ակոս» թերթի գլխավոր խմբագիր Հրանտ Դինքը սպանվել է 2007 թվականի հունվարի 19-ին` խմբագրության առջեւ նրա վրա կատարված զինված հարձակման արդյունքում: 2012 թվականի հունվարի 17-ին դատարանի որոշմամբ` Դինքի սպանության կազմակերպիչ Յասին Հայալը ցմահ բանտարկության դատապարտվեց, անմիջական հանցագործ Օգյուն Սամասթը` 22 տարվա ազատազրկման: 2014 թվականի հոկտեմբերին Ստամբուլի ծանր հանցագործությունների գործերով 5-րդ դատարանը որոշում էր կայացրել Հրանտ Դինքի սպանության գործով դատավարությունը սկսել զրոյից:
Դինքի սպանության գործով կա 85 կասկածյալ, որոնց շարքում է նաև Էրդողանի թիվ մեկ թշնամի հայտարարված գյուլենականների առաջնորդ Ֆեթուլլահ Գյուլենը: Կասկածյալներից 11-ը կալանավորված են, իսկ 10-ը հետախուզման մեջ:
Բաժանորդագրվեք մեր ալիքին Telegram-ում