Առաջիկայում համալսարանների հոգաբարձուների խորհուրդների հետ կապված լուծումներ կլինեն. Արայիկ Հարությունյան
ԵՐԵՎԱՆ, 12 ՀՈՒՆԻՍԻ, ԱՐՄԵՆՊՐԵՍ: Հայաստանում գործող համալսարանների հոգաբարձուների խորհուրդների հետ կապված խնդիրներն առաջիկայում լուծումներ կստանան:
«Արմենպրես»-ի հաղորդմամբ՝ լրագրողների հետ զրույցում այս մասին ասաց ՀՀ կրթության և գիտության նախարար Արայիկ Հարությունյանը:
«ԵՊՀ. ռեստարտ» նախաձեռնության վերաբերյալ, երբ դրա անդամները դիմել էին ՀՀ կրթության և գիտության նախարարություն, որպեսզի լուծարվի հոգաբարձուների խորհուրդը, նախարարը նշեց, որ իրենք և Կառավարությունը աշխատելու են բացառապես օրենքի սահմաններում:
«Մենք պատասխանատու ենք այն քվոտաների համար, որոնք ունենք հոգաբարձուների խորհրդում: Շուտով համալսարանների խորհուրդների հետ կապված լուծումներ կլինեն»,- ընդգծեց Հարությունյանը:
Անդրադառնալով ուսանողների՝ ԵՊՀ ռեկտոր Արամ Սիմոնյանի հրաժարականի պահանջին՝ նա շեշտեց, որ ցանկացած մարդ նման պահանջ ներկայացնելու իրավունք ունի:
Մայիսի 29-ին «ԵՊՀ. ռեստարտ» նախաձեռնության անդամները բողոքի ակցիա էին իրականացրել, որի ժամանակ պահանջում էին ռեկտորի հրաժարականը, անկախ աուդիտի անցկացում, ԵՊՀ հոգաբարձուների խորհրդի լուծարում, ԵՊՀ ուսանողական խորհրդի ու արհմիության գործունեության ժամանակավոր կասեցում։ Ռեկտորի և նախաձեռնության անդամների հանդիպումը որևէ հանգուցալուծման չէր հանգեցրել։ Նույն օրը՝ ԵՊՀ ռեկտոր Արամ Սիմոնյանը հոսպիտալացվել էր՝ կրծքավանդակի շրջանում ցավերի, ինչպես նաև բարձր ճնշման պատճառով:
Բաժանորդագրվեք մեր ալիքին Telegram-ում