ԵՐԵՎԱՆ, 8 ՀՈՒՆԻՍԻ, ԱՐՄԵՆՊՐԵՍ: Միացյալ Նահանգների Google ընկերությունն արհեստական ինտելեկտը չի օգտագործի զենքի համակարգերի կամ այնպիսի դիտարկումներ իրականացնելու համար, որոնք խախտում են մարդու իրավունքները, սակայն կշարունակի փոխգործակցել կառավարական գերատեսչությունների եւ զինվորականների հետ: Այս մասին, ինչպես տեղեկացնում Է «Արմենպրես»-ը, ասված Է Google-ի գլխավոր տնօրեն Սունդար Փիչայիի հայտարարության մեջ, որը հունիսի 7-ին զետեղվել Է ընկերության ինտերնետ-բլոգում:

Փիչային նաեւ շարադրել Է այն սկզբուքները, որոնցով ընկերությունը մտադիր Է ղեկավարվել այդ ուղղությամբ հետագա աշխատանքներում: Արհեստական ինտելեկտի օգտագործումն, ընդգծել Է նա, պետք Է լինի «սոցիալապես օգտակար», քանի որ այդ բնագավառում առաջընթացը վերաբերում Է առողջապահությանը, անվտանգությանը, Էներգետիկային, տրանսպորտին, արդյունաբերական արտադրությանը եւ զվարճանքների ոլորտին: Արհեստական ինտելեկտի ստեղծումը չպետք Է նպաստի «անարդարացի նախապաշարմունքներին» այն բանում, ինչ վերաբերում Է ռասային, ազգային եւ գենդերային ինքնությանը եւ քաղաքական կամ կրոնական հայացքներին, համոզված Է Փիչային: Նրա խոսքով՝ արհեստական ինտելեկտ մշակելիս կնախատեսվեն «անվտանգության ապահովման հուսալի միջոցներ», հաղորդել Է ՏԱՍՍ-ը: