Ժամանակը Երևանում՝ 11:07:36,   21 Նոյեմբեր

Ատոմ Ջանջուղազյանը հնարավոր համարում է առանձին հարկատեսակների մասով դրույքաչափերի նվազեցումը


ԵՐԵՎԱՆ, 1 ՀՈՒՆԻՍԻ, ԱՐՄԵՆՊՐԵՍ: ՀՀ ֆինանսների նախարար Ատոմ Ջանջուղազյանը չի բացառում տարբեր հարկատեսակների մասով դրույքաչափերի վերանայում:

 «Արմենպրես»-ի փոխանցմամբ՝ Ազգային ժողովում լրագրողների հետ զրույցում նա հավանական համարեց դա՝ նշելով, որ այն պետք է դառնա քննարկման թեմա: Պատասխանելով հարցին, արդյոք հարկային խիստ օրենսդրության պատճառով չէ՞, որ տնտեսավարողները խուսափում են հարկերից, Ատոմ Ջանջուղազյանն ասաց. «Չեմ կարծում, որ դա կարելի է պնդել, բայց որ պետք է քննարկել, միանշանակ է: Պետք է փորձենք վեր հանել այն պատճառները, որոնք հանգեցրել են այդ վիճակին: Այստեղ միակողմանի դատելը, կարծում եմ, ճիշտ որոշման չի հանգեցնի: Պետք է հավասարակշռված ու ճիշտ որոշումներով առաջ գնալ»:

Նրա դիտարկմամբ՝ միշտ էլ կա պարադոքսը՝ գնորդն ուզում է էժան գնով ձեռք բերել ապրանքներ, վաճառողը՝ թանկ վաճառել, հարկ վճարողը ցանկանում է քիչ հարկեր վճարել, հարկ հավաքողն ուզում է շատ հավաքել: «Պետք է բոլորս միասին ճիշտ փոխզիջում գտնենք: Կարևոր է վստահության բաղադրիչը, եթե բոլորս գանք այդ փոխզիջմանը որպես ամենաճիշտ լուծում, այսքան մտահոգված ու կասկածամիտ չենք լինի»,-ավելացրեց պաշտոնյան:

Այսինքն՝ «ակնկալենք հարկային դրույքաչափերի նվազեցում» հարցին ի պատասխան՝ ֆիննախն ասաց. «Ակնկալենք: Քննարկումների արդյունքում ամեն ինչ հնարավոր է ակնկալել, մենք նախկինում էլ ունեցել ենք քննարկումներ, տարբերակներից մեկն էլ այն էր, որ վերանայվեն ուղղակի հարկերի դրույքաչափերը, բայց այստեղ պետք է համալիր գնահատականներ տրվեն: Հավատացած եղեք, որ ուղղակի հարկերի դրույքաչափերի նվազեցումը գոնե կարճաժամկետ հատվածում հանգեցնելու է բյուջեի եկամուտների նվազեցման, իսկ մենք մյուս կողմից բյուջեով պարտավորություններ ունենք օրենքներով ստանձնած»:

Ինչ վերաբերում է ստվերից եկած եկամուտներին, ապա, ըստ Ջանջուղազյանի, եթե այն լինի միանվագ, դրա հիման վրա հնարավոր չի լինի երկարաժամկետ պարտավորություն ստանձնել: «Այդ դեպքում կքննարկենք անուղղակի հարկերի դրույքաչափերի վերանայման ճանապարհով բյուջեի հնարավոր ճեղքը փակելու եղանակը: Բայց դեռ վաղ է այդ մասին խոսելը: Ես հիմա մոտեցումն եմ ներկայացնում: Տրամաբանությունն այն է, որ ուղղակի հարկերի դրույքաչափերի նվազեցումը թույլ կտա ավելի շատ տնօրինվող եկամուտներ ունենալ, որոնք ներդրումների ու խնայողությունների վրա կազդեն»,-եզրափակեց պաշտոնյան:

 

 




Լրահոս

Բոլոր նորությունները    




Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
Яндекс.Метрика
Էջի կարգավորումներ