Նիկոլ Փաշինյանը վստահեցրել է, որ ՀՀ-ում այլևս ոչ մի մշակութային հուշարձան չի ոչնչացվի
ԵՐԵՎԱՆ, 25 ՄԱՅԻՍԻ, ԱՐՄԵՆՊՐԵՍ: ՀՀ ԳԱԱ հնագիտության և ազգագրության ինստիտուտի տնօրեն Պավել Ավետիսյանը մայիսի 25-ին ՀՀ վարչապետ Նիկոլ Փաշինյանի հետ հանդիպմանը նշեց, որ աշխարհում մշակութային քաղաքականության տարբեր մոդելներ կան, և ինքն այդպես էլ չի հասկացել՝ մեր երկրում որ մոդելով են առաջնորդվում: Ավետիսյանն առաջարկեց ստեղծել մի հարթակ և տարբեր տեսլականներ ունեցողներին հրավիրել դիսկուրսի՝ մեկ միասնական տեսլական ունենալու համար:
«Արմենպրես»-ի հաղորդմամբ`նա ասաց, որ կարևորում է պատմամշակութային ժառանգության պահպանման և արդիականության խնդիրները: Ավետիսյանը հիշեցրեց՝ ժամանակին կար Պատմության և մշակույթի հուշարձանների պահպանության կոմիտե, և հուշարձանների պահպանության, հանրահռչակման գործը Հայաստանում բարձր կարգավիճակ ուներ և լուրջ արդյունքներ գրանցեց, այնուհետև խնդիրներ եղան:
Նրա խոսքով` ճիշտ կլիներ կրկին հրավիրել մասնագետներին, նման կառույց ստեղծել, որն այդ կոմիտեի գործառույթները կատարի:
Ի պատասխան Պավել Ավետիսյանի` վարչապետը նշեց, որ իրենք չեն կարծում, թե կառավարությունը պետք է որոշի՝ արվեստագետը ինչով ու ինչպես զբաղվի, իրենց խնդիրն է, որ մշակույթի հետ հաղորդակցությունը դառնա նույնքան սովորական, ինչքան սովորական այլ երևույթներ: Նա տեղեկացրեց, որ մշակույթի նախարարությունում կա համապատասխան գործառույթն ունեցող գործակալություն, որի հետ պատգամավոր եղած տարիներին շփվելու առիթներ ունեցել է, համոզվել, որ այնտեղ բարեխիղճ մարդիկ են և բարեխղճորեն կատարում են իրենց աշխատանքը:
Փաշինյանն ասաց, որ այդ գործակալության անգործության վերաբերյալ բարձրաձայնումներն անտեղի էին, քանի որ համոզված է՝ նրանք գործը հանձնել էին այն մարմիններին, ովքեր պետք է զբաղվեին, բայց այդ մարմիններն անգործության են մատնված: «ՀՀ-ում այլևս ոչ մի մշակութային հուշարձան չի ոչնչացվի, չի վնասվի, և եթե միջամտություն կատարվի, միայն նրա պահպանության նպատակով»,- ընդգծեց Փաշինյանը:
Անդրադառնալով մշակութային քաղաքականությանը՝ վարչապետը նշեց, որ Կառավարության տեսլականը հենց այն է, ինչ ասաց. իրենց խնդիրն է ապահովել քաղաքացու և մշակույթի մշտական հաղորդակցությունը, և սա կառավարության ռազմավարական մոտեցումն է:
Բաժանորդագրվեք մեր ալիքին Telegram-ում