Փաշինյանի հետ հարաբերությունները երբևիցե սուր չեն եղել. Բաբլոյան
ԵՐԵՎԱՆ, 25 ՄԱՅԻՍԻ, ԱՐՄԵՆՊՐԵՍ: Ազգային ժողովի նախագահ Արա Բաբլոյանը խորհրդարանում հարցերը կանոնակարգելիս հավասարապես է մոտենում բոլոր խմբակցություններին և պատգամավորներին: «Արմենպրես»-ի հաղորդմամբ՝ ԱԺ նախագահն այս մասին հավաստիացրեց լրագրողների հետ ճեպազրույցում:
Անդրադառնալով Նիկոլ Փաշինյանի հետ իր հարաբերություններին՝ Բաբոլյանը նշեց՝ իրենց մարդկային հարաբերությունները երբևիցե սուր չեն եղել: «Եվ ինչպես բոլոր քաղաքակիրթ երկրներում և հասարակություններում՝ մեզ մոտ նույնպես ամեն բան հստակ կանոնակարգված է»,-նշեց Բաբլոյանը:
Նրա խոսքով՝ որպես Հանրապետական կուսակցության անդամ՝ ունի քաղաքական դիրքորոշում, որը համընկնում է կուսակցության դիրքորոշմանը: Անդրադառնալով հարցին՝ հավանական է արդյոք, որ խորհրդարանը ցրվի, ասաց ՝ դրա համար ոչ մի հիմք չկա այս պահին:
Հայաստանում ապրիլ-մայիս ամիսներին ներքաղաքական գործընթացների, ակցիաների, քաղաքացիական անհնազանդության գործողությունների հետևանքով խորհրդարանում փոքրամասնություն կազմող ուժը՝ «Ելք» խմբակցությունը ձևավորեց կառավարություն՝ ԲՀԿ-ի և ՀՅԴ-ի տրամադրելով նախարարական մի քանի մանդատ: ԱԺ-ում շարունակում է մեծամասնություն կազմել ՀՀԿ-ն: Մայիսի 8-ին ՀՀ վարչապետ ընտրված Նիկոլ Փաշինյանը ձգտում է անցկացնել արտահերթ խորհրդարանական ընտրություններ՝ մինչև տարեվերջ: Նա մինչ վարչապետ դառնալն ու դրանից հետո բազմիցս հայտարարել է, որ արդար և թափանցիկ արտահերթ խորհրդարանական ընտրությունների անցկացումն իրենց առաջնահերթություններից է: ՀՀԿ-ն դրանք աննպատակահարմար է որակում:
Բաժանորդագրվեք մեր ալիքին Telegram-ում